Алдын алыв чаралар гёрме тарыкъ

Артдагъы йылланы ва бу йылны гюзюню гьава шартлары авлакъ чычкъанланы генг кюйде яйылывуна болушлукъ эте.

Бу йыл бизин районну юрт хозяйство продукталар болдурувчулары авлакъ чычкъанланы заралын бек сездилер.

Айрокъда авлакъ чычкъан къылчыкълы гюзлюк, язлыкъ ашлыкъланы тюшюмюне бек зиян гелтирген участкалар болду. Бир-бир фермерлер, топуракъда айрыча доланагъан ёлдашлар авлакъ чычкъан себеп болуп чач­гъанын да алмагъанлары болду.

Авлакъ чычкъан емиш тереклеге, борлагъа да бек зиян гелтирме бола. Демек тереклени боюн гемирип, топуракъны тюбюнде борланы увакъ тамурларын ашап терекни, борланы азизлендирме, гьатта къурутма бола.

Агротетехника къуллукълары тийишли даражада оьтгерилмеген участкалар авлакъ чычкъанланы яйылывуна болушлукъ эте. Ондан къайры да ювугъунда ишлетилмейген, чёп-от басгъан участкалардан, сагалардан да авлакъ чычкъанлар чачыв тарлавлагъа гёчме бола. Чалт артагъан авлакъ чычкъанлагъа къаршы даим профилактика чараланы ­оьтгерип, оланы яйылывун тергеп турма тюше.

Емиш бавланы тюшюмю къайтарылып битген сонг тереклени тюбюне тёгюлген япыракъны, оьзге чёп алагъожаны жыйып тайдырма маслагьат этиле. Неге тюгюл, нас-алагъожаны тюбюнде авлакъ чычкъанлар уялана ва яйыла. Авлакъ чычкъанланы яйылывуну алдын алыв чараланы ичинде бавланы, юзюмлюклени терен харш салып сюрюв да агьамиятлы чараланы бириси.

Авлакъ чычкъанланы генг кюйде яйылывуну алдыналывда биология агъулангъан будай препарат да яхшы натижа бере. Демек, бир нече бюртюк агъуну ашагъан чычкъан брюшной тиф булан зараллана. Инфекция къабунгъан чычкъандан таба уядагъы бары да чычкъанлар зараллана ва къырыла.

Агъуну участкадагъы уяланы алдына бирни йимик тёкме тарыкъ. Агъуну чычкъанлагъа къаршы йылны незаманында да, гьатта 30 градус сувукъ къышда да къоллама ярай.

Агъуну юрт хозяйство продукталар болдурувчуланы заявкаларына гёре ФГБУ «Россельхозцентрны» ДР-деги филиалыны технология — аналитика лабораториясында гьазирлеме ва алма бола.

Авлакъ чычкъанланы алдын алыв чараланы оьт­геривге байлавлу англашылмайгъан масъалалары бар ёлдашлар ФГБУ «Россельхозцентрны» ДР-деги филиалыны ерлердеги къурумларына ёлукъма яда 8-872-260-32-53, 260-32-13 номерлеге телефон сёйлеп билме боласыз.

Апсерпаша Къыявов, ФГБУ “Россельхозцентр­ны” район бёлюгюню ёлбашчысы