«Фазу Алиева – халкъ поэзияны жавгьары»

Фазу Алиеваны аты булан бизин Ватаныбызны кёп миллетли ­халкъларыны адабиятыны девюрю байлавлу. Белгили шаир Ватаныбызны маданиятын, тюрлю милли адатларын артдырмакъ, сакъламакъ ва наслудан-наслугъа етишдирмек учун кёп иш этген къатынгиши.

Дагъыстанны халкъ шаири Фазу Алиева тувгъанлы 90 йыл битегенлигине багъышлангъан юбилей байрам чаралар оьтгерив плангъа гёре, Къарабудагъгент районда да «Фазу Алиева – халкъ поэзияны жавгьары» деген баш булан тюрлю байрам чаралар юрюле. Шолай, районну юрт китапханаларында халкъ шаирни яратывчулугъуна багъышлангъан китап ва сурат выс­тавкалар, ону шиъруларын охув чаралар оьтдю.

Барыбыз да билеген кюйде, Фазу Алиева СССР-де жагьил заманында, демек, оьзюне 33 йыл болагъанда, дагъыстанлы къатынланы арасында биринчи къатын болуп Халкъ шаир деген атгъа ес болгъан. Шолайлыкъда, ону аты дюньядагъы белгили къатынланы атлары язылгъан Китапгъа гирген.

Не къыйынлыкълар болса да, нечик заманлар гёрсе де, ол герти тавлу къыз деген атгъа амин кюйде къалгъан. Къатынланы бойнуна тюшген бары да авур намусланы тийишли кюйде кютген ва оьр пагьмулуланы арасында оьзюню ерин тапгъан.

Белгили маданият чалышывчу, Дагъыстаны Халкъ шаири, Россия ва Дагъыстан адабиятны алтын фондуна гирген кёп шиъру ва проза китапланы автору Фазу Алиева оьзюню девюрюню адамларыны юрегинде терен гьыз къойгъан.