Жамият палатаны иши

«Бугюнлерде жамият бирлешивлени чалышыву ва иши лап да агьамиятлы. Неге тюгюл де, шо бирлешивлер ва шоланы ёлбашчылары халкъны гьайын эте ва олай да бугюнлерде Украинада болуп турагъан питнеге оьзлени янашыву гьакъда билдире. Олай да, Донецк ва Луганск халкъ республикаланы ватандашлары дагъыстанлылагъа оьзлени баракалласын билдире. Бизин республикабыздан олагъа барагъан гуманитар кёмек лап да тарыкъ­лы ва асувлу. Шоллукъда, жамият бирлешивлени бугюнлерде таъсири ва гючю арта деп айтмагъа тийишли», — деп башлады республиканы ёлбашчысы оьзюню сёйлевюн.

Олай да, оьзюню сёйлевюнде ол республиканы лап да тарыкълы социал ва экономика масъалаларын чечивде жамият бирлешивлер ва оланы ёлбашчылары аслу ерни тутагъанын ачыкъ этди. Демек, шо масъалаланы чечмек учун Жамият палатада шолар ойлашылмагъа ва бир мекенли пикругъа гелмеге бола, халкъдан олагъа сесленивлер геле.

Сергей Меликов оьзюню сёйлевюнде аслу гьалда ашам­лыкъ продукталар ва дарманлар булан таъмин этив ишге айрыча тергев берилмеге гереклигин де аян этди. Шо ишге депутатлар, ихтияр якълав къурумлар булан янаша жамият бирлешивлер де къуршалмагъа тарыкълыгъын эсгерди.

«Жамиятдан таба гелеген ойланы ва пикруланы якъламакъ бизин борчубуз. Эгер олардан шолай янашыв болса, Жамият палата шолар ойлашылагъан майданча болмагъа тарыкъ. Сонг да, жамият бирлешивлер пачалыкъ гьакимият къурумланы ва идараланы чалышывуна тергев этмеге ихтиярлы. Республиканы Жамият палатасына муниципал къурулувларда иш гёреген шолай жамият палаталар да къошулмагъа герек», — деп Сергей Меликов оьзюню сёйлевюн тамамлады.

Дагъыстанны Жамият палатасыны ёлбашчысы Абдулмуъмин Ибрагьимов 2021-нчи йылда этилген иши гьакъда гьисап берди. Ону сёзлерине гёре, жамиятны янындан тергев болдурмакъ учун гьакимият къурумлар жамият бирлешивлер булан ты­гъыс кюйде аралыкълар тутмагъа ва ишлемеге борчлу.

ДР-ни Халкъ Жыйыныны ёлбашчысы Завур Аскендеров, оьзюню сёйлевюнде республиканы парламенти ва депутатлары жамият бирлешивлер булан тыгъыс аралыкълар тутмагъа гьазир экенлигин айта туруп, оьзюню сёзлерин тасдыкъ этмек учун шо гьакъда республика законлар къабул этилгенин айтды.

Завур Аскендеров берген баянлыкълагъа гёре, Жамият палатаны уьюрлери парламентни комитетлерини генгешлеринде, дёгерек столларында ва оьзге чараларда ортакъчылыкъ эте. Халкъ Жыйыныны комитетлерини янында жамият чалышывчулардан къурулгъан эксперт советлер иш гёре.

Оьзюню сёйлевюню ахырында ДР-ни Халкъ Жыйыныны ёлбашчысы Завур Аскендеров ДР-ни Жамият палатасына, ДР-ни Конституциясына гёре, законланы таклиф этмеге чакъырды. Демек, республиканы халкъыны яшавун яхшылашдырмакъ ва ёрукълашдырмакъ муратда жамият бирлешивлер таклиф этеген законлар къыйышывлу кюйде къабул этмеге тарыкъ.

ДР-ни Гьукуматыны башчысы Абдулмуслим Абдулмуслимов ва ДР-ни Башчысыны ва Гьукуматыны Администрациясыны ёлбашчысыны биринчи орунбасары Магьач Омаров республика гьакимият къурумларда иш гёреген жамият советлени чалышыву гьакъда баянлыкълар берди. Ачыкълашдырып айтсакъ, республиканы милли сиясат ва маданият министерликлеринде иш гёреген шолай жамият советлер шо министерликлени чалышывунда гьаракатчылыкъ этип ишлей.

ДР-ни Башчысыны жамият кёмекчиси Людмила Авшалумова ва ДР-ни Башчысыны янында иш гёреген жамият бирлешивлени ва халкъны ихтиярларын якълайгъан Советни ёлбашчысы Зикрулла Ильясов шо генгешни барышында оьзлени таклифлери булан сёйледилер.

Оьтгерилген генгешде ДР-ни Пачалыкъ секретары Магьамматсолтан Магьамматов да оьзюню ортакъчылыгъын болдурду ва гётерилген масъалалагъа гёре пикруларын айтды, таклифлер берди.