Меню
16+

Сетевое издание "Району яшаву"  «Будни района»

18.03.2022 10:03 Пятница
Категории (2):
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Аслу масъалалагъа къаралды

Автор: Багьавутдин Самадов

Гьаманда йимик, оьтген талатгюн, март айны 15-нде район администрацияны жыйынлар оьтгерилеген уллу залында районну башчысы Магьмут Амиралиевни ёлбашчылыгъы булан районну администрациясыны аппаратыны гезикли генгеши оьтгерилди. Генгешни ишинде район администрацияны управлениелерини ва бёлюклерини ёлбашчылары ва районну ичиндеги юртланы башчылары оьзлени ортакъчылыгъын болдурдулар.

Генгешни ачгъан ва юрютген районну гьакимбашы Магьмут Амиралиев оьзюню гиришив сёзюнде дюньяда тувулунгъан къувунлу гьалны гьакъында айтгъан сонг, ашамлыкъ ва сурсат продукталар булан халкъны таъмин этмек муратда районну администрациясы тийишли чаралар гёрмеге тарыкълыгъын аян этди. Шо гьакъда ол районну юрт хозяйство управлениесине тапшурувлар берди.

Сонг буса трибунагъа Къарабудагъгент районну ветеринар управлениесини ёлбашчысы Исмайыл Гьажиев чакъырылды ва оьзю ёлбашчылыкъ этеген идараны ишлери гьакъда залдагъылагъа баянлыкълар берди.

И.Гьажиевни сёзлерине гёре, бруцеллёз аврувну аян этмек муратда 2021-нчи йылда 15000-ден къолай уллу ва 7500-ден къолай гиччи мююзлю гьайванлагъа укол этил­ген. Шоланы 58-ини авруву бар деп токъташдырылгъан.

«2021-нчи йылны башында районубузну 7 участкасында карантин билдирилген эди. Оьтген йылны ахырында, гёрюлген чаралагъа кюрчюленип, шо 7 участканы 5-синде карантин тайдырылгъан.

Олай да, 13000-ге ювукъ уллу мююзлю гьайвандан туберкулёз аврувну аян этмек учун анализ алынгъан ва шо аврув табылмагъан. Сонг да, 7300 уллу мююзлю гьайвангъа лейкоз аврувну билмек муратда анализлер этилген ва шоланы 262-нде шо аврув бар деп токъташдырылгъан.

Шоллукъда, бруцеллёз ва лейкоз авруву бар уллу мююзлю гьайванлар, ветеринар законланы талапларына гёре, тайдырылгъан»,- деп узатды оьзюню сёйлевюн И.Гьажиев.

Олай да, И.Гьажиев эсгерген кюйде, 2021-нчи йылда, Роспотребнадзорну маълуматларына гёре, районда 8 адам бруцеллёз аврув булан авруйгъаны аян этилген. 2022-нчи йылны 2 айыны ичинде 4700 гьайвангъа бруцеллёз ва 3630 гьайвангъа лейкоз аврувланы ачыкъ этмек учун тергевлер болдурулгъан.

Оьзюню сёйлевюн тамамлай туруп, районну ветеринар управлениесини ёлбашчысы И.Гьажиев Къарабудагъгентде авруйгъан ва оьлген гьайван -малны тайдырмакъ учун хас ер (крематорий) къурулажагъын ачыкълашдырды.

Генгешни барышында районну баш архитектору Абдулла Гьажиев «Местные инициативы» деген хас программаларда районну ва юртланы администрацияларыны ортакъчылыкъ этивю гьакъда ва проект-смета документлени онгарылыву гьакъда баянлыкълар берди.

Баш архитектор А.Гьажиев эсгерген кюйде, ДР-ни Гьукуматыны хас къарарына алмашынывлар этилинген. Масала, юрт ерлерде къурулагъан къурулушлагъа ва объектлеге республика бюджетден гёрсетилеген кёмек акъча маяны (субсидия) 3 процент ва муниципал район учун буса 6 процент болмагъа тарыкълыгъын ­ташдырды.

Олай да, проектни яшавгъа чыгъармакъ учун сиптечилер (спонсор) салагъан харжны оьлчевю оьзю проектге гёрсетилген харжны 15 проценти болмагъа тарыкъ.

Шоллукъда, оьтген йыллар булан тенглешдиргенде, ерли юрт проектлеге гёрсетилеген акъча 2 миллиондан 5 миллион манатгъа гётерил­ген. Олай да, районну программаларына да 5 миллион манатны орнуна 10 миллион манат гёрсетиле.

«Шу ерде сиптечилерибиз этеген кёмекни ва салмагъа тарыкълы акъчаны оьлчевюню гьакъында мекенли айтмагъа сюемен. Демек, ерли юрт проектлеге сиптечилер лап азындан 800 минг манат гёрсетмеге герек. Районну проектлери учун буса шо акъчаны оьлчевю 1 миллион 900 минг манат болмагъа тарыкъ. Шоллукъда, район проектлер учун гёрсетилеген харж 12 миллион 450 минг, ерли проектлеге буса – 5 миллион 950 минг манат болмагъа тарыкъ», — деп узатды оьзюню сёйлевюн А.Гьажиев.

Ол оьзюню сёйлевюнде бугюн-буссагьат район проектлерде 3 объект ортакъчылыкъ этежегин ва шону учун хас проект-смета документлер гьазир экенлигин айтды. Сонг да, дагъы да районну ичиндеги 3 юртда ерли проектлени хас документлери гьазир болуп турагъанын аян этди.

Генгешде гётерилген масъалалагъа гёре, районну башчысы Магьмут Амиралиев оьзюню пикруларын ва таклифлерин айтып сёйледи. Масала, районну юрт хозяйство управлениесине юрт хозяйство малболдурувчулагъа пачалыкъны янындан этилеген янгы кёмеклени гьакъында баянлыкълар бермеге тапшурду. Олай да, хамисгюнлерде Манасда ­оьтгерилеген базарда санитар-эпидемия талапланы болдурувуна тергев бермеге чакъырды.

Районну гьакимбашы М.Амиралиев «Местные инициативы» деген республика программагъа районну ичиндеги бары да юртланы башчыларына къошулмагъа ва оьзлени ортакъчылыгъын болдурмагъа тапшурду. Олай да, юртларда газлашдырыв заявкаланы масъаласын март айны 31-и болгъунча уьстюнлю кюйде чечмеге чакъырды.

Олай да, районну гьакиммбашы генгешни вакътисинде район администрацияны жаваплы къуллукъчуларына ва районну ичиндеги юртланы башчыларына республика ва оьзге хас проектлерде гьаракатчы кюйде ортакъчылыкъ этмеге чакъырды.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3