ВАСИЯТ
Оьлмес учун гьеч бир зат ёкъ яралгъан.
Эрте, не геч бар зат гете тувгъандай.
Гелир бир гюн, къайсы гюндюр, ким биле.
Яшав токътар, баш оьзенни бувгъандай.
Азизлерим, абзар — уьюм, толтуруп
Сиз къалыгъыз, мен ёлдаман, гетемен.
Гёзюм яшлы, гёнгюм хошлу буса да.
Алданокъ шу васиятым этемен.
Азизлерим, мен оьлгенде юлкъунуп,
Бетигизни, чачыгъызны алмагъыз.
Оьзю берип, артда оьзю алагъан,
Тенгириге къара юзлю болмагъыз!
Тарыкъ тюгюл, къаралар да гиймегиз.
Кёп гийгенмен яшавумда къаралар.
Етти агъамдан бир къалгъынча басдырып,
Юрегимде тююн — тююн яралар.
Балаларым, уланларым, дёрт къызым.
Сизсиз мени гёзлеримни гёнгюлю.
Юз къуравлу юрегимни бавунда,
Юз макъамлы тереклени бюлбюлю.
Юртум — ерим елемеге уланым,
Акъ елкеним. Денгизимде юзмеге.
Халим — халчам, алтынларым, гюмюшюм.
Осум — бусум, къой елесин, къызлагъа!
Аллагь сизге насип берсин яшагъыз,
Тенгирини къысматына нетейим?!
Бары затым,тын — тын этип пайладым,
Язгъанларым кимге къоюп гетейим?
Гёк тангланы чолпан гёзлю ёлунда,
Арш сюзюлюп, къулач яйып къырларым,
Яшларымдай тувуп оьсген къолумда,
Сиз, нетерсиз, менсиз мени йырларым?
Яшавума ярыкъ берип янагъан,
Мен билемен, яшларымны тарыгъын.
Яшларым да, йырларым да къошулуп,
Ярыкъ этгенмикен, Гюнню ярыгъын?
Яшлыгъымны асырагъын, аягъан,
Кьлрабудагьгент, тюгюл бирде арегим.
Тек тилеймен.ата юртгъа гёмерсиз.
Ана топракъ тарта мени юрегим.
Кёпню гёрген «Къалгъа» бассын бавруна.
О бийикден юртгъа къулакъ асарман.
Къакъа тавлар, этегине сыйынып,
Даимлик, шо къонугяумну ясарман.
Тургъан ерим, тувгъан ерден тёр гёрюп
Азизлерим къойма сюйсе гентинде.
Не айтайым, сюйгенигиз этигиз,
Гьар макътавлар, Бекенезни бетине.
Ёкъ, дюньягъа мен гене де къайтарман,
Сююнч къайгъы, къагъып алса оюгъуз.
Топуракъны тебип чыкъгъан гьар гюлде,
Мени сесим барны сезип къоюгъуз.
Савда бу къыз, яшагъан деп халкъ учун,
Яхшылыкъгьа эсгерсегиз атымны,
Мен яшарман, юреклени тёрюнде
Оьлгенмен деп, ташламасман халкъымны.
Бир къаламым, бир зувгьанлар къолумда.
Аралашып тамур тартып гелеген.
Айтылмагъан кёп зат къалды юрекде.
Танг айларым очар тартып елеген.
Шавласына чая туруп аламны,
Танг шаршаву шарыллатып сёгюле.
Аявсуздан аслам чыкъгъан гёзъяшлар,
Намазлыкъгъа янгур болуп тёгюле.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
