Школаланы янгы охув йылгъа гьазирлиги

Чараны гиришив сёз булан районну башчысы Магьмут Амиралиев ачды ва юрютдю. Ол залдагъылар булан саламлашып битген сонг районну АТК-сыны генглешген жыйынында арагъа салынып къаралажакъ масъалаланы малим этди. Шоланы арасында районну билим берив ожакъларында къоркъунчсузлукъну болдурувгъа байлавлу оьтгерилген чаралар. Демек школаланы жамият къоркъунчсузлугъун болдурувда оьтгерилген чаралар, ­тарыкълы ясандырывлар булан таъминлиги арагъа салынып ойлашылды.

Бу масъалагъа гёре чарада районну билим берив управлениесини ёлбашчысыны къоркъунчсузлукъгъа къарайгъан орунбасары Магьамматсайит Гьажимагьамматов сёйледи. Ол районну школалары янгы охув йылын – Билимлени гюнюн къоркъунчсуз байрам шартларда оьтгерсин учун гёрюлген чараланы малим этди.

Ону сёйлевюнден ачыкъ болгъаны йимик, районну УО-ну школаларда къоркъунчсузлукъгъа къарайгъан бёлюгю алданокъ тасдыкъ этилген графикге гёре июл айны 15-нден август айны 15-ши болгъунча районну ичиндеги бары да билим, тарбия берив ожакъларда болгъанын, школаланы терроризмден къоруп сакълавгъа гьазирлигине айрыча тергев берилгенин ачыкълашдырды. Бугюнге районну ичиндеги школалар къоркъунчсузлукъ паспортлар алгъанын, тарыкълы алатлар булан ясандырылгъанын, бары да школалар айланасы булан бегитилгенин, бир-бир школаларда янгы заборлар тутма, яда барларына ремонт этме тарыгъын да яшырмады. Школаланы айланасы лампочкалар булан ярыкъ этиле.

Докладчы оьзюню сёйлевюнде районну 7 школасында стационар яда къол булан темир излейген алатлар булан таъминлигин, йылны ахырына бары да школаларда шолай алатлар ясандырылма гёз алгъа тутулгъанын ачыкълашдырды.

Районну бары да школалары видеокамералар булан ясандырылгъан ва сав суткалар ич ва тыш къарав юрюле.

Школаланы инженер-техника алатлары ишлей, ону техника гьалына хаслашдырылгъан къурум тергев эте.

Бары да школаларда гюндюзлер дежурныйлер бола, гечелер къаравчулар къаравул эте. Докладчы чарада оьзюню сёйлевюн тамамлай туруп, районну ичиндеги бары да школалар янгы охув йылгъа гьазирлигин бирдагъы керен ташдырды ва УО-ну рекомендациясы булан янгы 2024-2025-нчи охув йылны, Билимлени гюнюн 2-нчи сентябрде оьтгерме токъташдырылгъанны эсгерди.

“Районда яшланы школалагъа етишдиривде ва къайтарып алып барывда 36 транспорт единица къуршалажакъ. Оланы техника гьалы тергелген”,– деди оратор.

Чараны барышында район администрацияны жамият къоркъунчсузлугъуна къарайгъан бёлюгюню ёлбашчысы Магьач Гьюсейнов, районну ич ишлер бёлюгюню ёлбашчысыны орунбасары Насух Магьамматов ёлдашлар да чыгъып сёйледилер ва янгы охув йылгъа школаланы, яшлар бавларыны къоркъунчсузлукъ паспортлары тизилгенни такрарладылар. Оьсюп гелеген яш наслуну законлагъа къаршы иш гёреген гьаракатлардан къоруп сакъламакъ учун, тарбиялав, англатыв ишлени жанландырма тарыгъын айтдылар.

Чарада оьзюню гьасил чыгъарып сёйлевюнде районну башчысы Магьмут Амиралиев, озокъда, ватандашланы савлугъу, къоркъунчсузлугъу айорокъда яшланики бизге лап агьамиятлы экенни ­айтды. Шо саялы школаланы директорларына, яшлар бавларыны заведующийлерине, оьзге къурумланы ёлбашчыларына, ихтияр якълав къурумланы вакиллерине, Билимлени гюнюн шатлыкъны шартларында ­оьтгермек учун, къатты жамият низамны болдурма мекенли тапшурувлар берди.