Оьр атгъа лайыкълы муаллим

Муна, Дагъыстан республиканы башчысы Сергей Меликовну алдагъы гюнлерде, демек август айны 19-нда, къол басылгъан Указы булан Уллубийавул орта школаны муаллими Р.Магьамматовагъа «ДР-ни ат къазангъан муаллими» деген гьюрметли ат берил­ген. Шо оьр ат касбучуну намуслу ишине, иш уьстюндеги бажарывлулугъуна ва оьзюню касбу борчларын кютювге жаваплы янашывуна шагьатлыкъ эте.

Рабият Магьамматова 1953-нчю йылда октябр айны 10-нда Къарабудагъ­гент районну Уллубийавул юртунда тувгъан. 1973-нчю йылда Буйнакск шагьардагъы педучилищени тамамлагъан. 1990-нчы йылда буса Дагъыстан пачалыкъ педагогика институтну башлапгъы класланы муаллимлерин гьазирлейген факультетин битдирген.

Р.Магьамматова оьзюню узакъ-узакъ загьмат ёлун охуп битгинче башлагъан. Демек, 1971-нчи йылдан тутуп, бугюнлеге ерли ол ата юртундагъы школада башалпгъы класланы муаллими болуп ишлей, юртлу яшланы язмагъа, охумагъа, сурат этмеге, хабарлама уьйрете. Ону загь­мат стажы 53 йылдан авланып тура. 1995-нчи йылдан берли Рабият Магьамматова директорну башлапгъы класланы ишлерине къарайгъан орунбасары да дюр.

Рабият Магьамматова – оьр категориялы, уллу сынаву булангъы муаллим. 2007-нчи йылда ол «РФ-ни билим берив тармагъыны гьюрметли къуллукъчусу» деген бирдагъы бир оьр атгъа ес болгъан.

Р.Магьамматованы гьар дарсы муаллимни ва охувчуну бирликде юрюлеген яратывчулукъ иши булан оьте. Ол оьзюню ишинде билим беривню инг яхшы, енгил къайдаларын къоллай, гьар охувчуну юрегине ёл тапмагъа, ону инамлыгъын къазанма бажара.

Кёп йылланы узагъында къаныгъывлу загьматы булан топлагъан касбу сынавун Рабият Магьамматова жагьил касбучулар булан кёп сююп бёле, олагъа гьар не заманда да болагъан кёмегин эте. Олар да сынавлу касбучудан уьлгю ала, огъар абур-сый эте.

Уллубийавул школаны коллективи рагьмулу юрекли, таза къылыкълы, пагьмулу касбу ёлдашы Рабият Магьамматованы оьзюгер «ДР-ни ат къазангъан муаллими» деген ат берилгени булан къутлай туруп, къатты савлукъ ва ишинде уьстюнлюклер ёрай.