Къонакълагъа гезикли рагьмулу кёмек
Алдагъы гюн «Солнечный берег» деген РДОЦ-да Къарабудагъгент районну администрациясы ва ГБУ РД «КЦСОН» булан бирликде Курск областдан гелген уллулагъа ва яшлагъа кёмек къол узатылгъан.
Демек, Курск областдан «Солнечный берег» лагерде буссагьатгъы вакътиде 85 яш ва оланы узатагъан 11 уллулар савлугъун, нервлерин камиллешдирелер. Алдагъы гюнлерде къонакълар районну башчысы Магьмут Амиралиевден рагьмулу кёмек алгъанлар.
Яшлагъа опуракълар, аякъ гийимлер, татлиликлер, хас тазалыкъ болдурувда къолланагъан алатлар, ондан къайры да электроприборлар, чайниклер, итивлер ва оьзге алатлар савгъат этилген.
Яшланы аналары ва Курск областдан гелген яшланы узатагъанлар рагьмулу кёмеги саялы, ва оьзлени гьайын этегенине районну башчысы Магьмут Амиралиевге ва районну бары да халкъына разилигин, баракалласын билдирелер.
Эсигизге салабыз, шолай якълав язбашда лагерге Белгород областдан гелген къонакълагъа да этилген эди.
Курск областдан гелип “Солнечный берег” деген лагерде ял алагъан къонакълар Каспий денгизни, айлана якъны гёзеллигинден гьайран, тамаша болалар. Лагерни къуллукъчулары оьзлеге лайыкълы, исси янашывуна разилигин билдирелер.
Район къонакъланы гьар даим де ачыкъ юреклери, генгине ачылгъан къоллары булан къаршылап гелген. Шо мердеш гьали де давам этиле.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
