Меню
16+

Сетевое издание "Району яшаву"  «Будни района»

05.07.2024 09:45 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Агьлю – яшавну кюрчюсю

Автор: Нюрбият Абдуллабекова

Белгили кюйде, гьар йыл июль айны 8-нде Агьлюню, сюювню ва аминликни гюню оьтгериле.

Агьлю – халкъны сюювюню, бирлигини, инамлыгъыны кюрчюсю. Ол адам учун яшавну уллу савгъаты.

Дагъыстанлы адамланы агьлю адатлары гьар заман гючлю болуп гелген. Биз де шо уллаталарыбыздан гелген асил адатларыбызны унутулма къоймай, гележек наслулагъа узатмагъа герекбиз.

РФ-ни Президенти В.Путинни къарары булан 2024-нчю йыл – Агьлюню йылы деп белгиленген. Шогъар байлавлу болуп бизин Къарабудагъгент районда йылны башындан берли кёп тюрлю чаралар, гьаракатлар оьтгерилип тура.

Ачыкълашдырып айтсакъ, йылны экинчи айы – февралны 8-нде Къарабудагъгентдеги Баш китапханада Агьлюню йылыны ачылывуна багъышланып «2024-нчю йылны агьлюлерини агьлюсю» деген баш булан флешмоб оьтгерилген. Олай да, шо гюн Валерий Мамаевни сёзлерине гёре Агьлюню йылыны макъамы «Гимни» язлыгъан ва «Агьлю – уьй, агьлю – парахатлыкъ!» деген баш булан тематика сагьат да оьтгерилген.

Сонг да, март айны 7-нде район администрацияны залында Агьлюню йылына багъышланып «Агьлю – яшавну сигьрулу белгиси» деген уллу байрам чара оьтген. Эсгерилген чара бирче 50 йыл ва дагъы да кёп яшагъан агьлюлени, оьзлени загьматы булан районну оьсювю учун уллу къошум этген династия агьлюлени, хас дав чараны ортакъчыларыны агьлюлерин, кёп авлетли ва алып сакълангъан яшлар оьсеген агьлюлени гьюрметлевге, багъышланып оьтген. Чараны ахырында бары да агьлюлеге район администрацияны янындан эсделик савгъатлар да тапшурулгъан.

Шо гюн байрам чарагъа гелип болмагъан агьлюлер де тергевсюз къалмагъан. Демек, март айны 14-нде район администрацияны бёлюк­лерини ёлбашчылары Найида Мурзаева, Насибат Алхасова ва Абдулгьамит Мамагишиев шо агьлюлени уьйлерине баргъан ва разилигин билдирип савгъатлар тапшургъан.

Март айны 21-нде Къарабудагъгент Баш китапхананы сиптечилиги булан яшлар учун язылгъан китапланы жумалыгъына багъышланып «Читает семья – читает страна» деген баш бушлан Агьлюню йылына байлавлу байрам чара оьтген. Чараны гьюрметли къонагъы гьисапда шаир, язывчу, таржумачы ва яшлар учун чыгъагъан «Соколёнок» деген журналны редактору Насрулла Байболатов чакъырылгъан. Чараны барышында райондагъы китапханаланы актив охувчуларына ва хас коррекция школа-интернатны тарбияланывчуларына адамы яшавунда агьлюню аслу ролю гьакъда англатыв берилген.

Май айны 16-нда Къарабудагъгент юрт администрацияны башчысы Магьамматсолтан Гьасанов, районну тамазаларыны Советини председатели Абдулгьамит Мамагишиев ва район администрацияны маданият ва туризм бёлюгюню ёлбашчысы Найида Мурзаева кёп йыллар, демек 44 йылдан къолай, бирче яшагъан Арсанали ва Анисат Алиевлени, Нюрмагьаммат ва Нюрсагьадат Каранаевлени, Залибек ва Жансият Залибековланы уьйлерине барып, оланы Агьлюню ­халкъара гюню булан къутлагъан.

Озокъда, шолай насипли яшав къурмагъа бажаргъан агьлюлер янгы агьлю къурагъанлар учун уьлгю болуп токътай.

Шулай насипли агьлюлеге ва кёмек тийишли агьлюлеге этилеген тергев бир де уьзюлмей. Оланы якълавгъа байлавлу чаралар бугюн­леге ерли давам этилип тура.

Агьлюню якълавгъа багъышлангъан чаралар бек маъналы. Олар Ватаныбызны гележегине инам­лыкъ тувдурагъан, халкъгъа гюч береген ва жамиятны ругьун гётереген агьлю адатларыбызны сакълап наслудан-наслугъа узатывгъа болушлукъ эте.

Насипли, татывлу, къатты ожакъ – уьлкени ва жамиятны сав-саламатлыкъ гаранты.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

0