Бюджет харжланы къоллав…

Июн айны 5-нде ДР-ни ёлбашчысы видеоконференция къайдада оператив штабны гезикли жыйынын оьтгерди. Шо чараны барышында Къарабудагъгент районну башчысы Магьмут Амиралиев де ортакъчылыгъын болдурду.

Шо гюнгю жыйынны барышында ДР-ни башчысы Сергей Меликовну ёлбашчылыгъы булан бюджет акъча маяланы къоллав ва РФ-ни Президенти Владимир Путинни къарары булан Каспийск шагьаргъа «Город трудовой доблести» деген гьюрметли ат берген. Шо агьвалатгъа байлавлу болуп шагьарны безендирив чаралар арагъа салынып къаралгъан.

Чарада регионну акъча ишлер министрини заманлыкъ­гъа борчларын кютеген Шамил Дабишев билдиреген кюйде, республиканы бюджети бары да социал объектлени харжлар булан заманында таъмин этилегенин ачыкълашдырды. Ондан къайры да, адамлагъа алапалар, яшланы пособиялары, коммунал къуллукълагъа харжлар, дарманлагъа енгиллик­лери бар адамлагъа гёрсетилеген харжлар, ишлемейгенлеге гьар ай берилеген харжлар, стипендия ва оьзгелери заманында берилегени эсгерилди.

Републиканы башчысы Сергей Меликов оьзюню сёйлевюнде гёрсетилген харжланы къоллавгъа тергевню гючлендирме, гьар ай министерликлерде, водомстволарда, муниципал оьлчевде харжлавланы графигине агьамият бакъдырма тапшурувлар берди.

Каспийск шагьарда «Город трудовой доблести» деген белгини къураш­дырыв ишлени барышы гьакъда муниципалитетни башчысы Борис Гонцов баянлыкъ берген. Ону сёйлевюнден ачыкъ болгъаны йимик, монумент ерлешдирилежек ер токъташдырылгъан. Ол шагьарны ортасында Абдуллаевни атындагъы бульварда Хизроевни ва Ильяшенко орамланы арасында ясандырылажагъын аянлашдыргъан.

Проектни рамкасында бульварны майданы безендирилежек. Шону ичинде айлана якъны яшыллашдырыв, тереклер орнатыв, бар яшыллыкъланы сакълав ва къорув, гечелер ярыкъ болсун учун лампочкалар салма, гиччипавлар учун хас зона этме ва оьзге ишлер оьтгерме гёз алгъа тутгъанын аян этип сёйледи.

Сергей Меликов оьзюню сёйлевюнде аслу ишлер яй заманда этилип битме тарыгъын айтды.

Эсгерме тарыкъ, совет йылларда Каспийск шагьар гьайран дав-промышленный комплекси булан та­нывлу эди. Шагьарны предприятиелеринде гьар-тюрлю якълав продукция чыгъарыла эди.

“Шагьаргъа РФ-ни Президентини 2022-нчи йылны ноябр айыны 15-нде къабул этген къарары булан «Город трудовой доблести» деген гьюрметли ат Уллу Ватан давда немис-фашист елевчюлерден уьст геливде «Дагдизель» заводну загьмат коллективи этген аслам къошуму саялы берилген”, — деди регионну башчысы.