Багьа берилди
Алдагъы гюнлерде ДР-ни Халкъ Жыйыныны билим берив ва илму комитетини ёлбашчылыгъы булан Къарабудагъгент гимназияда бизин районну билим берив тармагъындагъы лап да агьамиятлы масъалаланы гьакъында генгеш оьтгерилди.
Шо генгешде республикабызны парламентини билим берив ва илму комитетини ёлбашчысы Елена Павлюченко ва ону ёлдашлары, ДР-ни билим берив ва илму министрини биринчи орунбасары Айида Далгьатова, яшланы ихтиярларын якълайгъан толу ихтиярлы вакили Марина Ежова, районну гьакимбашы Магьмут Амиралиев, районну билим берив управлениени ёлбашчысы Тажли Хизриева, районну ичиндеги школаланы ёлбашчылары ва муаллимлер оьзлени ортакъчылыгъын болдурдулар.
Генгешни ачгъан ва юрютген ДР-ни Халкъ Жыйыныны депутаты Е.Павлюченко оьзю ёлбашчылыкъ этеген комитет бугюн Къарабудагъгентде генгешин оьтгерегенин ва районну билим берив тармакъдагъы масъалаларыны уьстюнде пикру алышдырыв этежегин ачыкълашдырды.
ДР-ни билим берив ва илму министрини биринчи орунбасары А.Далгьатова, республиканы парламентини билим берив ва илму комитетини ёлбашчысыны орунбасары Р.Ибрагьимов, яшланы ихтиярларын якълайгъан толу ихтиярлы вакили М. Ежова ва оьзге жаваплы къуллукъчулар районну билим берив тармагъыны гьакъында баянлыкълар бердилер.
Олар оьзлени сёйлевлеринде билим берив ва тарбия ишлени гьакъында айта туруп, яшланы ихтиярларын якълайгъан республика законну, олай да республиканы парламентини комитетине март айда гелген федерал законланы проектлери гьакъда лакъыр юрютдюлер.
Олай да, комитетни генгешини барышында бизин районубузну билим берив тармагъыны гьакъында мекенли айтылды – ОГЭ-лени ва ЕГЭ-лени гьасиллери гёрсетилди, билим беривде йиберилеген кемчиликлер ачыкъ этилди, шолагъа гёре олар оьзлени таклифлерин бердилер.
Къарабудагъгент районну башчысы Магьмут Амиралиев ДР-ни Халкъ Жыйыныны депутатларына, билим берив ва илму министерлигини жаваплы къуллукъчуларына булай генгеш оьтгергени ва районну билим берив тармагъыны гьалы гьакъда анализ этгени саялы баракалласын билдирди.
Сонг да ол районну билим берив управлениеси, школаланы педагогика коллективлери охувчуланы билимини сан янын артдырмакъ учун дагъы да яхшы кюйде чалышажагъын ташдырды.
Генгешни ахырында ДР-ни Халкъ Жыйыныны ва ДР-ни билим берив ва илму министерлигини атындан школаларда уьлгюлю кюйде загьмат тёгеген бир нече муаллимге баракалла кагъызлар ва белгилер тапшурулду.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
