Ёлбашчы ва насигьатчы

Бугюнлерде Уллубий­авул орта школаны директоруну къуллугъунда ишлейген Умаева Муъминат Абдулкъапуровна оьзюню ишине намуслу ва жавапчылыгъы булан янаша деп айтмагъа болабыз. Ол анадаш школасында загьмат тёгегени ва юртлу яшлагъа билим берегени 48 йылдан айлангъан.

Муъминат Умаева Дагъыстан пачалыкъ педагогика институтну химия ва биология факультетин уьстюнлю кюйде тамамлагъан ва ата юртундагъы школада эсгерилген предметлерден хыйлы йылланы узагъында дарс берген.

Муъминат Умаева оьзю юрютеген дарсланы мекенли ва тындырыкълы кюйде оьтгере, билим беривню методикасын яхшы биле, ол дарс берген охувчулар билим алывда уьстюнлюклеге ва оьрлюклеге етишген. Клас ёлбашчы гьисапда да ол яшлагъа герти ва гьакъ ёлланы гёрсетген ва таклиф этген, ол дарс берген охувчулар бугюнлерде де огъар насигьат сорай геле.

Муъминат Умаева бажарывлу къурумчу, уьлгюлю насигьатчы гьисапда оьзюню иш ёлдашларына да гьакъыллы ойларын ва пикруларын айтгъан. Ол оьзю ишлейген коллективни бирикдирмеге ва сыкълашдырмагъа бажаргъан.

М.Умаева 2006-нчы йылда «Россияны лап да бажарывлу муаллими» деген конкурсунда ортакъчылыкъ этген, РФ-ни Президентини грантына ес болгъан. Олай да, огъар школаны, район администрацияны атындан грамоталар ва эсделик савгъатлар берилген.

2007-нчи йылда Уллубийавул орта школаны директоруну охув-тарбия ишлерине къарайгъан орунбасарыны къуллугъуна белгиленген. Шо ишинде де ол оьзюню борчларын оьр даражада ва намуслу кюйде юрютген. Олай да, ол инг башлап оьзюгер, сонг буса иш ёлдашларына талаплы касбучу.

Умаева Муъминат Абдулкъапуровна 2013-нчю йылны декабр айыны 18-нде Уллубийавул орта школаны директоруну къуллугъуна белгиленген. Ол шо ишде ишлейгени 10 йыл бола тура. Шо вакътини ичинде школаны умуми гьалы алышынгъан деп айтмагъа тийишли.

2022-нчи йылны яйлыкъ каникулланы вакътисинде Уллубийавул орта школаны 3 де къабатына мекенли кюйде мукъаятлы капитал ремонт этилди. Демек, терезелери, эшиклери, тамлары, поллары, иссилик береген системасы, ярыкълары – шулар барысы да бюс-бютюнлей алышынды ва янгыртылды.

Шу оьрде эсгерилген ишлени тийишли ва уьстюнлю кюйде кютмек муратда Муъминат Умаева ял­лыкъ тапмайлы, янын салып ятмайлы, гечеси-гюню булан чалышып турду. Каникулланы вакътисинде де ол бир сагьат да уьюнде турмады ва ял алмады. Шолай чалышып ишлеген сонг, капитал ремонтну натижасы да арив болду.

Уллубийавул орта школаны муаллимлери ва охувчулары охув ва билим яндан да бир къадар уьстюнлюклеге етишген ва шоланы узатып тура. Демек, районну даражасында оьтгерилеген конкурсларда, олимпиадаларда ва спорт ярышларда алдынлы ерлени къазана геле.

Муъминат Умаева школаны директору болуп ишлей туруп, коллективни ва билим алагъан яшланы гьар гюн гьайын эте. Айрокъда тарбия ва къылыкъ темалагъа ол айрыча агьамият бере. Коллектив ва охувчулар булан оьтгерилеген жыйынларда сёйлейгенде, Муъминат Умаева бизин ата-бабаларыбыздан къалгъан яхшы ва асил адатларыбызны кёп эсгере, бир-биревге эдеп ва гьюрмет этмекни таклиф эте.