Яш кочапны гьюрметледилер

Оьзюне он йыл тюгюл битмеген яш кочап ябушувну сырларына Дёргелидеги яшланы ва яшёрюмлени спортшколасында уьйрене. Ол ондан алда да республика оьлчевюнде юрюлген ярышларда ортакъчы­лыкъ этип, мекенли оьрлюклеге етишип къайтгъан.

Алдагъы гюнлерде ата юртунда ону гьюрметлевге багъышлангъан гьаракатда да шо гьакъда айтылды. Инг алда оьтгерилген бир нече ярышланы алдынлысын Къарабудагъгент районну админстрациясыны физкультурагъа ва спортгъа къарайгъан бёлюгюню ёлбашчысы Завур Умаракъаев къутлап сёйледи. Ол ярышланы бары да тиретлеринден уьстюнлю кюйде оьтюп, ябушув халчагъа оьзю булан тогъатартмагъа чыкъгъанлагъа сыртын ерге тийдирмеге къоймагъан яш кочапгъа гележекде де оьрлюклер ёрады. Шону булан бирге ону ярышлагъа гьазирлеген тренери Н. Жанаевге оьзюню разилигин билдире туруп, республиканы оьлчевюнде тувуп оьсген юртун данггъа чыгъармагъа къаст этеген спортчулар бизин районну гьакимлик къурумларыны янындан гьар заманда якълав табажагъын гертиледи.

Шондан сонг, Дёргели юртну башчысы Гьамзат Мурзаев де Магьаммат-сайит Алиевни ва ону тренерини атына айтылгъан къутлавлагъа къошулду. Юрт администрацияны янындан яшлагъа спортну гьар тюрлю журалары булан машгъул болмакъ учун тийишли шарт­лар болдурувгъа гележекде гьайлы янашажагъын билдирди. Оланы ярышларда ортакъчылыкъ этивюне де болушлукъ этип туражагъына да инандырды. Дёргели юрт жамиятыны оьзге вакиллери де, биринден-бири алып дегенлей, республика ярышларда алдынлыкъ алгъан яш кочапны ва ону тренерини атына лайыкълы сёзлер айтдылар. Оьзюню гезигинде Магьаммат-сайит Алиев де гележекде тутушув ябушув булан машгъул болувуна байлавлу гьаракатын туварып къоймажагъын ташдырды.