Тийишли савгъат

Шо гьакъда айта туруп, Къарабудагъгент районну Гьели юрту маканы гьисапланагъан Жамал Агьматов да къайпанмайгъан гьалында оьзюне тапшурулгъан асгер тапшурувланы намуслу кюйде кютюп гелегенин айрыча эсгермеге тюше.

Ачыкълашдырып айтгъанда, бугюнлерде ол оьзюню асгер ёлдашлары булан бирче Донбас бойланы ва шонда яшайгъанланы душмандан азат этмек учун белсенген. Инг алда ол Луганск халкъ республикасындагъы Райалександровка деген юртун эркин этмек учун юрюлеген гьаракатгъа гиришген. Эсгерилген юртну айланасында юрюлген оьжетли ябушувларда 90-нчы танк девизияда къуллукъ этегенлер ва хас асгер гьаракатгъа гёнгюллю кюйде къуршалгъанлар булан бирче оьзлеге къаршы турагъан 18 украиналы солдатны есирликге алмагъа бажаргъан. Шондан къайры да, Польшадан гелип, украиналы асгерлер булан бирге ябушагъан бирдагъы бир адам да оланы къолуна тюшген. Арадан заман оьтюп, ол къуршалгъан асгер бёлюк­лери Лоскутовка юртну да эркин этип, миллетчилерден тазалагъан.

Шону булан бирге, ол оьзлеге къаршы турагъан асгер бёлюклерини дав матагьларына ес болуп, шоланы барысын да ерли милицияны къуллукъчуларына тапшургъан. Шо гьаракатланы барышында гёрсетген игитлиги учун Жамал Агьматов Къоччакълыкъны ордени булан савгъатлангъан. Шо гьакъдагъы къараргъа Россияны Президенти Владимир Путин 2022-нчи йылны ноябр айыны 30-нда къол салгъан. Шо орден аманлыкъ къурумларда хыйлы йыллар къуллукъ этип, ич ишлер къурумларыны майору гьисапда отставкагъа чыгъып, ял алагъан ону атасы Магьамматмуратгъа Ватанны Якълавчусуну гюнюню алдында тапшурулгъан.

Шо кюйде тувуп оьсген элине аминлигин сакълайгъан Жамал Агьматов гьелили Магьамматмуратны ва Рабиятны агьлюсюнде 1991-нчи йылда Магьачкъала шагьарда тувгъан Дагъыстан пачалыкъ халкъ хозяйство университетни тамамлагъан сонг, ол ич ишлер бёлюклерини бирисинде полиция машин гьайдавчу гьисапда къуллукъ этмеге башлагъан. Сонггъа таба, 2021-нчи йылдан тутуп, ол ДПС-ни полкуну инспектору этилип чыгъарылгъан. 2022-нчи йылны ноябр айыны 27-синде Буйнакскиде дав гьазирлигини эки жумалыкъ курсларын битдирген сонг, ол Украинагъа хас асгер гьаракат юрюлеген бойлагъа бакъдырылгъан. Жамал Агьматов оьзюню агьлюсю булан бирче уьюнде сабурсуз кюйде къаравуллайгъан эки къызны атасы да дюр.

Биз де асгерде намуслу къуллукъ этип, Украинада юрюлеген хас асгер гьаракатларда ортакъчылыгъын давам этеген Жамал Агьматовгъа ва ону инисине эсенлик-аманлыкъ­ ёрайбыз. Украинаны халкъына парахатлыкъ гелтирип, олагъа да уьюне эсен-аман къайтмагъа насип болсун!