Муалимлени де муаллими

Ол Къарабудагъгент юртда 1965-нчи йылда гьайван доктор болуп чалышгъан Тонаев Магьамматгьанапини ва гьар тюрлю къуллукъларда ишлеп тургъан агьлюсю Люмуниятны кёп яшлы ожагъында тувгъан.

Ата юртундагъы уьч номерли орта школаны битдирип чыкъгъан сонг, ол 1983-нчю йылда Дагъыстан пачалыкъ педагогика университетге охумагъа тюшген. Эсгерилген оьр охув ожакъны тамамлап, бир номерли орта школада химия дарсланы юрютмеге башлагъан.

Ону гьакъында сёзюмню узата туруп, эл арада, халкъ арада Яратгъаныбыз буюрмаса, врачны ва муаллимни касбусун танглап, ким де сукъланардай юрютмеге бажарылмайгъаны гьакъда айтылагъанын эсге салмагъа сюемен. Неге тюгюл де, Раупат Гьажиева, бир де къопдурувсуз айтгъанда, Тенгирини пурманы булан муаллим болгъан инг бажарывлу касбучуланы бириси гьисаплана. Ол яшдан берли кёп сююп танглагъан касбусуна берил­генлиги иш ёлдашларына, айрыча алгъанда, муаллимлик касбуну юрютювню ёлуна янгы тюшген яш касбучулагъа уьлгю болуп токътай. Нечик де, оьзю бугюнлерде ишлейген Къарабудагъ­гентдеги гимназияда юрютеген касбусуна бюс-бютюн­лей берилип, гьар гюнлюк, артгъа салмайлы кютюлмеге тюшеген аваралар булан яшай. Дагъы кюйде де бажарылмай. Ол оьрде айтылгъан йимик, эсгерилеген билим берив идараны директоруну охув ишлеге къарайгъан заместители. Шо къуллукъгъа 1998-нчи йылда белгиленген. Янгыз касбу борчларын кюте туруп тюгюл, юрегини талабына гёре де, гимназияны директоруну биринчи ойчусу, насигьатчысы гьисапда белсенген.

Шо гьакъда айта туруп, янгыз яшланы тюгюл, муаллимлени де муаллими болуп токътайгъаны гьакъда эсгермекни айрыча тийишли гёремен. Ол оьзюню ишин Къарабудагъ­гентдеги гимназияда чалышагъан бары да муаллимлер охувчуланы билимлерини сан янын камиллешдиривню ёлуна тюшюп иш гёрер йимик къурмагъа бажаргъан. Дейгеним, Раупат Магьамматгьанапиевна шо охув ожакъгъа бир-биревню англап, арагъа чыкъгъан янгы сиптелени яшавгъа чыгъармагъа болагъан, охувчулагъа билим беривде мекенли сынав топлагъан, англавлу ва бажарывлу, ишин билеген, касбусуна берилген муаллимлер булан къуршалгъаны да шексиз кюйде шогъар болушлукъ этип геле. Къарабудагъгентдеги гимназияда билим алагъанлар янгыз район оьлчевде тюгюл, республика даражасында юрюлеген, гьатта Бютюнроссия олимпиадаларда, яратывчулукъ къаравларда, охувчу яшланы арасында юрюлеген илму-сынав конференцияларда ортакъчылыкъ этип, гьар гезик де алдынлы ерлеге ес болагъаны шону герти кюйде исбатлай. Айтагъаным, Раупат Гьажиеваны ёлбашчылыгъы булан бары да муаллимлени бирлешип иш гёрегени, олай да охутувну ва тарбия беривню сан янын артдырывну гьайында къалып, билим беривню янгы къайдалары уьстюн­лю кюйде яшавгъа гийирилегени, охувчу яшланы билимлерини сан янына тергев этивню къайдалары мекенлешдирилегени гьакъыкъатда натижалы болуп да чыгъа.

Ону шолай къастлы гьаракаты гьар тюрлю йылларда «Дагъыстанны билим беривюню отличниги», «Россияны умуми ва касбу билим беривюню гьюрметли къуллукъчусу» деген сыйлы атлар булан белгиленген.

Мен де торайып гелеген яш нас­луну гележегин гёз алгъа тутуп чалышагъан муаллим ва билим берив тармакъны бажарывлу къурумчусу Раупат Гьажиевагъа кютмеге урунгъан гьар не ишде де оьрлюклер ёрамагъа сюемен.