Гьаракатчы касбучу

Мен гьали оьзюмню макъаламда билим хазнаны хадирин билип, лайыкълы янашагъан Дёргели юртдагъы китапхананы ёлбашчысы Айшат Изиеваны гьакъында сёз айтмагъа сюемен.

Изиева Айшат Солтангишиевна 1959-нчу йылда Дёргели юртда тувгъан. Башлапгъы билимин ол ата юртундагъы орта школада алгъан. Айшат Изиева Дагъыстан Пачалыкъ маданият-ярыкъландырыв училищени битдирген.

1976-нчы йылда ол Дёргели юртдагъы китапхананы ёлбашчысы болуп оьзюню загьмат ёлун башлай ва шо вакътилерден берли башлагъан ишин бугюнлерде де уьлгюлю кюйде юрютюп тура. Демек, 50 йылгъа ювукъ вакътини ичинде бир де ара бёлмей чалышып турагъан А.Изиева оьзюню бажарывлу, жаваплы, оьз ишине яратывчу къайдада янашагъан касбучу гьисапда гёрсетме бажаргъан ва юртлуларыны абурун къазангъан. Ол ата юртунда ва ондан тышда оьтгерилеген маданият гьаракатларда да оьзюню ортакъчылыгъын болдура. Олай да, бизин девюрню пагьмулу язывчулары ва шаирлери А.Жачаевни, Б.Магьамматовну, У.Ибрагьимованы, Ш.Алишеваны, М.Ягьияевни ва оьзгелерини яратывчулугъуна багъышланып оьтгерилеген ахшамларында да актив кюйде ортакъчылыкъ эте.

Юрт китапханада оьзю оьтгереген чаралагъа А.Изиева уллулардан къайры да, юрт школаланы охувчуларын, яшлар бавуна юрюйген гиччипавланы да къуршап, оланы китап охувгъа иштагьын гётерме бажара. Шо саялы болма да ярай, яшлар бу китапханагъа кёп сююп геле, онда оьт­герилеген гьар тюрлю чаралагъа да сююп къуршала. А.Изиеваны ёлбашчылыгъы булан юртлу къатынгишилени къуршайгъан «Энемжая», айлана якъны къоруп сакълавгъа байлавлу «Адам ва табиат», ёммакълар булан иштагьлангъан яшлар учун «Ал тюслю чечек» деген клублар иш гёрегени кёп йыллар бола.

Айшат Изиева 1997-нчи йылда «Дагъыстанны маданиятыны ат къазангъан къуллукъчусу» деген гьюрметли атгъа ес болгъан. Ол оьзюню къайратлы загьматы, гьаракатчылыгъы ва ишини низамлы къурулуву саялы кёп керенлер район администрацияны янындан гьюрметлев грамоталар, макътав кагъызлар булан савгъатлангъан. Олай да, ону ёлбашчылыгъы булан 2012-нчи йылда Дёргели юрт китапхана «Анадаш Кавказда парахат яшав» деген яшланы арасында Регионал охув фестивальда ортакъчылыкъ этген ва иштагьландырыв приз ва диплом булан савгъатлангъан. Озокъда, шолай уьстюнлюклер А.Изиеваны иш уьстюнде гьар гюнлюк гьаракатыны натижасы болуп токътай.

Биз яшавда оьз ерин, кёп сюеген касбусун табып, ишине толу кюйде берилип, оьзгелеге де уьлгю болуп чалышагъан Айшат Изиеваны оьтген 8 Март байрам булан къутлай туруп, гележекде къатты савлукъ, ишинде уьстюнлюклер, сююмлю охувчулар ёрайбыз.