Яшланы савлугъуна жаваплы янашма тарыкъ

Жыйында районну башчысы Магьмут Амиралиев ортакъчылыгъын болдурду ва жыйынны оьзю юрютдю.

Районну башчысы М.Ами­ралиев залдагъылар булан саламлашып битген сонг, залдагъы ва районну бары да къатын-къызларын язбашны лап гёзел байрамы – 8-нчи март Къатынланы Халкъара гюню булан къутлады.

Шо гюнгю чарада эки масъала арагъа салынып ойлашылды. 1-нчи масъала районну школаларында, савлай районда от тюшювлени алдын алывну гьалы. Бу масъалагъа гёре МЧС-ни Каспийск ва бизин районгъа къарайгъан управлениесини вакили Азиз Абдулкеримов чыгъып сёйледи.

Ону сёйлевюнден ачыкъ болгъаны йимик, районда от тюшювлени алдын алывда ёлугъагъан кемчиликлени малим этди. Оьтген 2022-нчи йылда от тюшювлени алдын алыв къурумну къуллукъчулары 600 керен от тюшювлер болгъан ерлеге чыкъгъан. Насипге, хата болгъан гезиклер болмагъан. Докладчы оьзюню сёйлевюнде от тюшювлер болуп къалса, сувну запасын болдурагъан къуюлагъа хас транспорт барма болмайгъан ерлер барын да аян этди.

От тюшювлени сёндюргенче, ону алдын алма рагьат. Шо саялы идараларда, къурумларда от тюшювлени алдын алывда къоллайгъан алатлар, сигнализациялар болма тюшегенин эсгерди.

Гьали чакъгъа исси тюше геле. Эрте язбашда адамлар абзар-ягъа участкаларында, авлакъларда къуругъан отдан участкаларын тазаламакъ учун яллата. Шо бирдокъда ярамайгъанын аян этди.

МЧС-ни бизин районгъа къарайгъан вакили районда от тюшювлерден сакъ болмакъ, алдын алмакъ учун юртланы башчыларына ерлерде гёнгюллю дружиналар къурма, от тюшювлер болуп къалма къоркъунчлукъ бар участкаланы трактор салып сюрме таклиф этди.

Шо гюнгю чарада 2-нчи масъала полиомиелит аврувну адын алывгъа байлавлу янгы тувгъан ва 10 йылгъа ювукъ яшланы шо аврувгъа къаршы вакцинация этив. Бу масъала арагъа чыкъгъаны ва ону алдын алывну чараларын гёрме тарыгъы гьакъда сёз юрюлегени бир нече ай бола. Тек, ата-аналар негер буса да, шо аврувгъа къаршы вакцина этдирме сюймейлер. Врачлар район газетни бетлеринден таба полиомиелит аврув яшланы савлугъуна нечик зарал этме болагъанны, огъар къаршы вакцина этив яшны савлугъуна бир де къоркъунчлу тюгюл экени гьакъда англатывлар берелер. Берсе -берсин, бир-бир аналар яшларына вакцина этдирме къаршылар.

Март айны 7-нде болгъан чарада полиомиелит аврув яшланы савлугъуна нечик зарал гелтирегени гьакъда Роспотребнадзорну бизин районгъа къарайгъан управлениесини ёлбашчысы Омар Абачараев мисаллар гелтирип сёйледи. Ону сёйлевюнден ачыкъ болгъаны йимик, заманында полиомиелитни алдын алывну чаралары гёрюлмесе, яшлар савлугъун тас этме коляскагъа тюшюп къалма болагъанын, лап къоркъунчлусу – жагьил уланлар, къызлар авлетсиз къалма болагъанын аян этип сёйледи.

Чарада чыгъып сёйлеген район больницаны баш врачы Расул Гьиравовну сёйлевю районда полиомиелит аврувгъа къаршы районну школаларында, яшлар бавларында вакцина этивню барышын ачыкъ этип англатды. Ону сёйлевюнден ачыкъ болгъаны йимик, районда 14525 яшгъа иммунизация этме тарыкъ. Артдагъы гюнлерде районда полиомиелит аврувгъа къаршы вакцина этив жанлангъан буса да, прививка этивню барышы рази къалардай тюгюлюн эсгерди, районда яшларына вакцина этдирме сюймейген ата-аналар барын ташдырды.

Вакцина этилмеген башлап­гъы класланы охувчулары, яшлар бавларыны тарбиялавчулары 60 гюн школагъа, яшлар бавларына къабул этилме ярамайгъанын айтды.

Чарада оьзюню гьасил чыгъарып сёйлевюнде районну башчысы М.Ами­ралиев шо гюн арагъа салынып къаралгъан масъалаланы яшавгъа чыгъармакъ учун жаваплы ёлдашлагъа тапшурувлар берди.