Дюньяны 7 керен чемпиону
Спортну темасы гьар даимде агьамиятлы. Спорт яшёрюмлени тарбиялавда ва физкультура оьсювюнде уллу роль ойнай, оланы савлугъун беклешдире, сонг да терс ёллагъа тюшерден де сакълай. Бизин жамиятыбыз, гьукумат бугюнлерде спорт тармакъгъа айрыча тергев бере, гьатта яшланы ва яшёрюмлени спортгъа къуршамакъны агьамиятлыгъы да артдагъы йылларда арта геле. Шогъар байлавлу болуп савлай уьлкеде, республикада яшлар учун кёп имканлыкълар яратыла, янгы спортзаллар, спорт майданчалар къурула, школаларда спортну гьар тюрлю жураларына гёре ярышлар оьтгериле. Шолайлыкъда, яшланы ва яшёрюмлени хыйлыларыны спортгъа иштагьы арта.
Шолай имканлыкълар бизин Къакъашура юртну яшёрюмлери учун да яратылгъан, юртда олар учун 2 спортзал, футбол майданча, воркаут ачылып иш гёре. Бизин юртлу спортсменлени кёбюсю оьзлени спорт булан байлавлу биринчи абатларын юртдагъы яшёрюмлени спорт школасындан башлагъан.
Мен гьали оьзюмню макъаламда охувчуларыбызны спорт тармакъда яхшы натижалагъа етишген, бизин районну, гьатта ата юртуну атын савлай дюньягъа малим этген, гёрмекли кочабыбыз къакъашуралы Зайнутдин Зайнуков булан таныш этме сюемен. Алдагъы гюнлерде З.Зайнуков бизин редакцияда къонакълыкъда болду.
Зайнутдин Зайнуков 1987-нчи йылда 2-нчи августда Къарабудагъгент районну Къакъашура юртунда Салавутдин ва Патимат Зайнуковланы агьлюсюнде тувгъан. Башлапгъы билимин ол юртдагъы 2 номерли макътапда ала. Школа чагъындан башлап Зайнутдинни спортгъа аваслыгъы гьис этиле. Ол оьзге спортсменлени уьстюнлюклеринден къуванып, олардан уьлгю алма ва олагъа тенг болма къаст эте. Зайнутдинни агъалары ону спортгъа айрыча гьюнери, иштагьы барын гьис этип, юртдагъы спортзалгъа гелтире, огъар спорт гьаракатын узатма имканлыкълар бере. Биринчи тренери Басыр Къочакаевни ёлбашчылыгъыны тюбюнде ол спортну тутушуп ябушув журасындан оьзюню бажарывлулугъун камиллешдире.
Юртдагъы школаны 9 класын битдирген сонг Зайнутдин Магьачкъалада охувун узата: башлап бизнес-колледжде, сонг буса Дагъыстан Пачалыкъ педагогика университетни физкультура ва спорт факультетинде охуй. Охуву булан янаша ол «Спартак» деген жамият спорткомплексге юрюй, спорт булан машгъуллугъун дагъыдан-дагъы гючлендирме башлай ва спортну самбо, дзюдо журалары булан машгъул бола. Пагьмулу тренерлер Тагьир Умаевни, Шамиль Алиевни уьйретивлери ва оьзюню къаныгъывлу гьаракаты, къатты низамы булан Зайнутдин гёрмекли уьстюнлюклеге етише. Айтмагъа сюегеним, ону яшавунда эринчекликге бир де ер болмагъан. Охувун тамамлагъан сонг З.Зайнуков ата юртуна къайта, амма мунда узакъ токътамай. Спорт булан байлавлу умутларын яшавгъа чыгъармакъ муратда 2009-нчу йылда ол Москвагъа гете. Шонда да пагьмулулугъу айтылгъан тренер Дмитрий Селевахинни ёлбашчылыгъыны тюбюнде Зайнутдин спорт булан машгъуллугъун узата.
Ол спортну самбо журасындан ДР-ни 4 керен чемпиону, дзюдо журасындан – 3 керен чемпиону. Олай да, шо йыл Москвада спортну дзюдо журасындан оьтгерилеген бютюнроссия ярышларында 1-нчи ерни алып, Зайнутдин «Спортну дзюдо журасыны устасы» деген оьр атгъа ес бола.
Яш заманындан тутуп спортну тюрлю-тюрлю журалары булан машгъул болса да, эсли чагъына етишгенде ол юрегинде айрыча ер тапгъан джиу-джитсу ва грэпплинг жураларын сайлай ва кёп сююп сайлагъан ишинде уллу уьстюнлюклеге етише.
2010-нчу йылда Санкт-Петербург шагьарда Беверли-Хилз BJJ кубогуна оьтгерилген турнирни алдынлысы.
2011-нчи йылда Москва шагьарда оьтгерилген MOSCOW OPEN BJJ CUP турнирни алдынлысы.
2013-нчю йылда Венгрия пачалыкъда спортну грэпплинг UWW(Gi) журасындан Европаны чемпиону. Шо йылда уьлкебизни тахшагьары Москвада оьтгерилген грэпплинг UWW (No Gi) журасындан Россияны чемпиону.
2012-нчи йылда Нарафоминск шагьарда оьтгерилген джиу-джитсуну гьар тюрлю жураларындан Россияны чемпиону.
2014-нчю йыл Самара шагьарда спортну грэпплинг UWW (Gi) журасындан Россияны чемпиону. Шо йылда Москва шагьарда спортну оьрде эсгерилген журасындан Дюньяны чемпиону деген атгъа ес болгъан.
2015-нчи йылда Турция пачалыгъында шо биз оьрде эсгерип гетген спортну журасындан бирдагъы керен Дюньяны чемпиону деген атгъа ес болгъан. Олай да, 2015-нчи йылда шу спортну оьрде такрарлап турагъан журасындан Россияны чемпиону болгъан.
2016-нчы йылда спортну оьзю юреги кёп ушатып танглагъан журасындан Белоруссия пачалыкъда оьтгерилген Дюнья ярышланы алдынлысы.
2017-нчи йылда Азербайджан пачалыкъда оьтгерилген ярышларда ол шо оьр уьстюнлюклени къазана.
2018-нчи йылда Зайнутдин Зайнуковгъа спортну грэпплинг журасындан етишген уьстюнлюклери саялы «Россияны спортуну ат къазангъан устасы» деген оьр ат берилген.
2018-нчи йылда З.Зайнуков спортну Бразилияда генг кюйде яйылгъан джиу-джитсу журасындан «Къара белбавгъа» ес болгъан.
2019-нчу йылда шо биз оьрде эсгерип турагъан спортну журасындан Москва шагьарда оьтгерилген Дюнья чемпионатында 1-нчи ерни алгъан.
Бугюн Зайнутдин Зайнуков спортну шо эсгерилген жураларындан Европаны 3 керен чемпиону, Дюньяны 7 керен чемпиону болуп белгили. Юртлулары Зайнутдинни уьстюнлюклеринден къувана, ону булан оьктем бола. Спорт булан машгъул яшлар буса Зайнутдинден уьлгю ала, шолай уьстюнлюклеге етишме талпына, гьаракат этелер.
Биз де районубузну, юртубузну абурун артдырып турагъан оьзден, намуслу, саламат уланыбыз Зайнутдин Зайнуковгъа гележекде де спортда дагъы да оьр уьстюнлюклер ва къатты савлукъ ёрайбыз.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
