Гечигип къалмасбызмы?!
Хас маълуматлар исбат этеген кюйде, артдагъы 2-3 йылны ичинде районда къылчыкълы гюзлюк ва язлыкъ ашлыкълардан алынагъан тюшюмлер йыл сайын арта геле. Авлакъчылыкъ булан машгъул фермерлерибиз янгыз участкаланы тюшюмлюлюгюню гьайын этип къоймай, ишлетилеген топуракъланы майданларын артдырмакъны гьайын да этелер. Масъала, 2022-нчи йылда районда чачылгъан гюзлюк къылчыкълы ашлыкъланы майданлары 10920 гектар эди буса, 2023-нчю йылды шо санав 750 гектаргъа артгъан. Чачылгъан къылчыкълы гюзлюк ашлыкъланы гьар гектарындан артдагъы 3 йылны ичинде арта гьисапда 23-28 центнер ашлыкъ алына геле.
Ашлыкъ оьсдюрюв булан машгъул фермерлерибиз бу йыл гюзде 2024-нчю йыл тюшюмю учун 11 минг гектардан къолай майданлагъа къылчыкълы гюзлюк ашлыкълар чачма хыял этелер.
Айтма тарыкъ, районну муниципал къурулувларында гюз чачывгъа топуракълар сюрюв гьазирлев авур шартларда юрюле. Шогъар да бизин якъларда чакъ, мунда гюз оьтесиз къургъакъ гелегени себеп. Топуракъ къатты, сюрме къыйын. Ондан къайры да фермерлер, топуракъда айрыча доланагъан ёлдашлар чачывгъа гьазир участкаларында, топуракъны дымлыгъы ёкъ саялы, чачма тавакал этмей токътагъанлар. Озокъда, оланы да англама къыйын тюгюл. Къуру топуракъгъа урлукъ тёгюп баззатма ким сюе?! Амма гюз чачывну макъталгъан болжаллары булай да гетген буса да дагьнилер болгъан буса ноябрны къалгъан гюнлеринде де гьаракат этип чачыв ишлени къурумлу кюйде оьтгерме бажарылар эди.
Тек синоптиклер айтагъан кюйде, ноябр ай бизин якъларда онча янгурлар къаравуллама тюшмей. Декабр ай буса – толу къышны айы.
“Янгурланы гёзлеп районда гюз чачыв къолдан чыкъмасмы?” деген сорав тувулуна.
Чанг уруп турагъан авлакълагъа къарагъанда, не айтагъанны да билмей къаласан...
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
