Дав ва загьмат ёллары

Башлапгъы вакътисинден тутуп, ол темир ёл асгерлерде телеграфист, старший механик, сонггъа таба полкну байлавлукъ болдурагъан ротасында баш механик болуп къуллукъ эте. Фашист елевчюлер булангъы къагьрулу давланы вакътисинде де Арсан Абдуллагьатов, оьзге совет солдатлар йимик, уьстюнлюк бизинки болажакъгъа инанып, даим алгъа абат алгъан ва хыйлы шагьарланы душмандан азат эте туруп, Курск ябушувларда, Великие Луки, Калинин област, Литва, Кавунас, Вильнюс, Польша, Германия, Кенигсберг, Приморск край ва башгъа давларда ортакъчылыкъ этген. Германияны фашистлери булангъы давда уьст болгъан сонг да, Арсан Абдуллагьатов къуллукъ этеген полкну солдатлары Япония давуна да бакъдырылып, шонда да уьстюнлюкню болдуралар. Давлар бизин солдатланы пайдасына тамамланса да, Приморск крайда солдатланы алышдырмагъа эргишилер етишмейгенине гёре, Арсан Абдуллагьатовгъа шонда 1948-нчи йылны орталары болгъунча къалмагъа тюше. Ону дав ёлларда гёрсетген къоччакълыкълары ватанны оьрденлери, медаллары булан белгиленген. Арсан Абдуллагьатов «Орден Отечественной войны», «Медаль за боевые заслуги», «Медаль за отвагу», «Медаль за взятие Кенигсберга», «Медаль за победу над Германией в Великой Отечественной войне 1941-1945 гг.», «Медаль за доблестный труд ВОВ», «Медаль за долголетний добросовестный труд», «Медаль 100-летие Жукова» ва олай кёп оьзгелери булан савгъатлангъан. Армиядан къайтгъан сонг, Арсан Абдуллагьатов, райвоенкоматда администрация-хозяйство ишде ишлей туруп школагъа да юрюй ва орта билимин толумлашдыра.

1952-нчи йылдан башлап Къарабудагъгент райком партияны агитация ва пропаганда бёлюгюнде инспектор болуп ишлеме башлай. Шондан туруп ол област партия школасына охума бакъдырыла.

1964-нчю йыл буса Арсан Абдуллагьатов Ростовдагъы партияны оьр школасын заочно охуп битдире. Шону булан да токътамайлы, ол охувун узата ва 1969-нчу йылда Магьачкъаладагъы юртхозяйство институтну агрономлар гьазирлейген факультетин заочно охуп битдирип, агроном касбугъа да ес бола.

1965-нчи йылдан башлап 11 йылны узагъында райПО-ну председатели болуп ишлейген вакътисинде Арсан Абдуллагьатов райондагъы сатыв-алыв къурумланы ишлерин оьр даражагъа чыгъарып, республика оьлчевде бизин райПО хыйлы йыллар социалист ярышны алдынлысы болуп юрюген. Шолай яхшы ишлери саялы да Арсангъа шо йылларда «Сатыв-алывну отличниги» деген ат берилген эди. Ондан сонг да, А.Абдуллагьатов «Дагъыстан АССР-ни жамият ашамлыгъыны ва сатыв-алывуну ат къазангъан къуллукъчусу» деген гьюрметли атгъа ес болду. Алдына салынгъан ишлени оьр даражада кютюп юрюйгени саялы, 1973-нчю йылда Россияны пайдаландырывчуланы кооперациясыны Москвада оьтгерил­ген 6-нчы съездинде де Арсан Абдуллагьатов ортакъчылыкъ этген. Не ишге бакъдырылып, къайсы къурумда ишлесе де, намусу булан загьмат тёгюп уьйренген Арсан Абдуллагьатов кёп керенлер юрт советге, район Советге депутат болуп да сайлангъан.

Сонггъу 1976,1978, 1983-нчю йылларда да Арсан Зиявутдинович юрт­хозяйство управлениеде старший агроном, «Рассвет» совхозну парткомуну секретары болуп да загьмат тёкген. Бары да загьмат стажы 50 йыллардан да оьтеген Арсан Абдуллагьатов пенсиягъа чыгъып ял алывуну вакътисинде де бош турмагъан. Районну яшёрюмлерини насигьатчысы, тамазаларыны Советини председатели ва олай да кёп тюрлю жамият ишлерин юрютюп тургъан. 1997-нчи йылда ол Гьаж къылып, Аллагьны алдындагъы борчун да кютюп гелип, Арсангьажи болуп, халкъ арада дагъыдан-дагъы абурун артдыргъан.

Къайда ишлесе де, халкъны яшавун, турушун яхшылашдырмакъ учун белсенип, чалышып юрюген давну ва загьматны ветераны Арсан Абдуллагьатов бугюн арабызда ёкъ буса да, ону дав ва загьмат ёлларын бизге ва бизден сонггъу наслулагъа унутмагъа ярамай. Шолай уланларыбыз булан биз гьар заманда да оьктем болмагъа ихтиярлыбыз.