Ёлланы ёрукълу сакълавчулар

Шо саялы артдагъы йылларда бизин уьлкеде, республикада, ёлланы онгарывгъа, оланы сан янын болдурувгъа кёп тергев бериле.

Бизин районда да ёлланы гьалына яхшы къарав бар. Гьар йыллар булан ёллар онгарыла, асфальт салына, оьзге тетиклери тайдырыла. Трассалагъа, юртланы хас орамларына тийишли белгилер салына, “полосалар” тартыла. Юртларыбызны бир-бири булан байлайгъан ёлланы, юртланы ичиндеги орамланы онгарывда, асфальт салывда кёп ишлер этилгенни гёрюп турабыз.

2022-нчи йылны биринчи кварталы да битди. Гьавагъа яхшы иссилик тюшюп геле. Алдагъы гюн район газетни баш редактору Асадулла Гьажиев ва мен районну ёллагъа къарайгъан къурумуну ёлбашчысы Вагьапгьажи Алиев булан ону ишчи кабинетинде ёлугъуп, бу йыл этме гёз алгъа тутулгъан ишлеге байлавлу баянлыкълар алдыкъ.

Бизин соравларыбызгъа жаваплар къайтара туруп Вагьапгьажи Алиев булай деди:

-Бизин коллективни уьюрлери 246 километр мезгилдеги республика ва ерли агьамияты булангъы ёлланы къуллукъларын кюте. Къуллукъларын дегенде, ёлланы тетиклерин онгарабыз, тарыкълы ерлеге ёл юрюшню низамын сакълайгъан белгилер, адамлагъа юрюме полосалар этебиз. Ёл бойланы эки де ягъаларында тазалыкъны гьалына къарайбыз ва болдурабыз.

Бу йыл бизин къурумну коллективи ёлланы онгарывда, асфальт салывда хыйлы иш этме гёз алгъа тутгъан.

Масъала, Дагавтодорну линиясындан таба Къакъашурагъа барагъан ёлну 8 км мезгилине асфальт салажакъбыз. Шо ишлени кютмек учун тендерни утгъанбыз. Гьазирлик гёрюв ишлер юрюле. Ондан къайры да шо программа булан “Дёргели- Къакъашура” ёлну 600 метр мезгилине асфальт салынажакъ.

Светофордан Олимпге ерли 1,5 км асфальт салма гёз алгъа тутулгъан. Шо ишлени кютмек учун буссагьатгъы вакътиде тийишли проект кагъызлары онгарылып тура.

Ёл юрюшде къоркъунчсузлукъну болдурмакъ муратда Къарабудагъгент юртну Сергендиравулуну зийрет­леринден тутуп асфальт заводгъа ерли ярыкъ этеген линия салынажакъ. “Паравул-Жюнгютей” ёлну юртдагъы мезгилине де ярыкълар салынажакъ.

Мен бугюн газетде ортакъчылыкъ этегенимден пайдалынып, проектлени яшавгъа чыгъармакъ учун районну башчысы Магьмут Амиралиевни гьаракатын эсгерме сюемен. Ол районгъа этилеген ишлеге юреги авруп, шо ишлени яшавгъа чыгъармакъ учун бары гьаракатны эте, имканлыкъланы къоллама чабып айлана.

Бизин къурумну коллективи 2022-нчи йылда район программагъа, транспорт налоглардан жыйылагъан акъча маялагъа гёре, ерлерде кёп безендирив, онгарыв ишлер этме гёз алгъа тутулгъан.

Муна, бугюнлерде Уллубийавулну янгы межитини абзарына , айлана янына асфальт салма башлажакъбыз. Гьазирлик ишлер этилген. Гертилей де, бу йыл районда 40 миллиондан да къолай транспорт налоглагъа жыйылгъан акъча маялагъа ишлер этилежек.Шоланы барысын да бизин къурумну коллективи кютежек десем тюз болмас. Гьали де тендерлер оьтгерилмеген. Бир-бир тендерлени биз утарбыз деп эсиме геле.

– Гертилей де районда ёлланы ёрукълу сакълавда, юртланы орамларыны, адамлар юрюйген ерлени онгарывда кёп иш этилгенин бирев де инкар этме болмас. Сизин коллектив къолда этген уьстюнлюклер де, ишлер де адамны гьаракаты болма тарыкъ. Бир-эки яхшы ишлейгенлени атларын эсгерсегиз.

– Бизин коллективде ишлейгенлени барысы да яхшы ишлей. Олар тапшурувлагъа намуслу янашагъан ёлдашлар. Бирче ишлейген адамланы бирин макътап, оьзгесин эсгермей къоймакъ тюз болмас.

Тек, сиз атларын малим этме сюе бусагъыз эсгерейим: Нюрмагьаммат Къаранаев, Завур Минатуллаев грейдерист Рашит Даниялов, шофер Абакар Паталиев, механизатор Камалутдин Тавлуев ва оьзгелери шолайлардан саналалар.