Язлыкъ авлакъ ишлер

Авлакъ ишлени къурумлу ва сан янлы кюйде оьтгеривде юрт хозяйство техниканы агьамиятлыгъы уллу. Амма бизде авлакъ ишлени заманында ва къурумлу кюйде оьтгермек учун таман даражада техника етише десек, оьзюбюз-­оьзюбюзню алдатагъан болабыз.

Районда, санав якъдан алгъанда, техника бар. Тек оланы авадан яны эсги, иш ресурслары тезден битген, авлакъ ишлени вакътисинде кёп бузула, иш чыгъарыву осал.

Техниканы гьакъында сёз ­чыкъгъанда, касбучулар районда лизинге алынгъан «шу чакъы» техника бар дейлер. Лизинге алынгъан техника бар, шо – нечакъы да яхшы. Лизинге техника алгъан ёлдашлар биринчилей оьзлени участкаларыны къуллукъларын кютелер, сонг ­оьзгелени къуллукъларын кютме къол ялгъайлар. Олагъа да бирев де бир зат да айтма болмайбыз.

Районда техниканы къытлыгъы гьис этиле буса да, язлыкъ авлакъ ишлени барышы яман гёрюнмей.

Къарабудагъгент, Губден, Къакъашура юрт муниципал къурулувларда язлыкъ къылчыкълы ашлыкълар, бир йыллыкъ, кёп йыллыкъ отлар чачыв узатыла. Къарабудагъгентни топуракъларында апрель айны 3-нде адамлар 8 гектаргъа люцерна чачгъан, уьч-дёрт ёлдаш дагъы да 8-10 гектаргъа люцерна чачма топуракъларын гьазирлеп, люцерна чачагъан тракторгъа къарап токътагъан.

Къурбуки, Къарабудагъгент юрт муниципал къурулувланы топуракъларында бахча оьсюмлюклени чачыв ишлер де узатыла.

Ачыкъ топуракъда овошлар орнатыв ишлер де ювукъ гюнлени ичинде башланажакъ. Шо муратда гьазирлик гёрюв ишлер юрюле.

Бир тюрлю авурлукълагъа да къарамайлы, юрт хозяйство тармакъны къуллукъчулары язлыкълар чачывну тапшурувларын уьстюнлю кюйде яшавгъа чыгъармакъ, районну сурсат аманлыгъын болдурмакъ учун, бел-бюгюп, этек чалып, гьаракат этип айланалар.