Меню
16+

Сетевое издание "Району яшаву"  «Будни района»

08.04.2022 10:13 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Яшланы ял алыву

Автор: Шихав Къайирбеков

Апрель айны 5-нде район администрацияны жыйынлар оьтгерилеген уллу залында администрацияны аппаратыны гезикли генгеши оьтгерилди. Генгешде район администрацияны башчысыны орунбасарлары, бёлюклерини ёлбашчылары, юртланы башчылары, райцентрде иш гёреген къурумланы ёлбашчылары, чакъырылып гелген районубузну денгиз боюнда ерлешген лагерлени ёлбашчылары, полицияны район бёлюгюню вакили ортакъчылыгъын болдурдулар.

Генгешни гиришив сёз булан районну башчысы Магьмут Амиралиев ачды ва юрютдю. Ол залдагъылар булан саламлашып битген сонг, шо гюнгю жыйынны аслу темасына чыкъгъынча залдагъылагъа Украинада юрюлеген хас чарагъа байлавлу болуп бизин республикагъа, шону ичинде бизин районгъа да къалмагъалар бар ерлерден чыгъып Донбасны, Украинаны ватандашлары гелме болагъанын малим этди. Къонакъланы лайыкълы кюйде къаршылама гьазирлик гёрмек учун оьзюню орунбасарларына, тийишли къурумлагъа тапшурувлар берди.

Районда яшланы яйлыкъ ял алывун болдурувгъа гьазирлик гёрювде этилген ишлени гьакъында баянлыкъ берме районну яшёрюмлени ишине ва социал сиясатына къарайгъан бёлюгюню ёлбашчысы Гюлжанат Темированы чакъырды.

Гюлжанат Темирова оьзюн сёзюн булай башлады:

-Яшланы яйлыкъ ял алыву янгыз сиясат якъдан якълав болуп къалмай, ол яшны яратывчу оьсювюне, ругь байлыгъына, дюньягъа къаравуна, интеллект оьсювюне де болушлукъ эте. Каникулланы вакътисинде яшлар арив ял болалар, савлугъу беклеше, дос аралыкълар тута.

Гюлжанат Темированы сёйлевюнден ачыкъ болгъаны йимик, 2021-нчи йылда бизин районну территориясында ерлешген лагерлерде 2456 яшёрюм оьзлени савлугъун беклешдирген. Шоланы 566-сы бизин райондан. Шондан къайры да 10 яш «Орлёнок», «Планета» лагерлерде савлугъун камиллешдирген.

Гетген йыл бизин райондан 32 яш «Артек» деген Бютюнсоюз савлукъ сакълав центрда арив ял алып къайтгъан.

Сёзюн узата туруп, Г.Темирова район администрация яшланы яйлыкъ ял алывуна айрыча агьамият бакъдырагъанын ачыкълашдырды.

Гюлжанат Темированы сёйлевюнден аян болгъаны йимик, районубузну территориясындагъы денгиз боюнда 4 савлукъ сакълав лагер иш гёре. Олар: «Солнечный берег» деген яшланы савлугъун беклешдиреген республика Центр, «Анжи-мастер», «Аист», «Парус» деген яшланы савлугъун беклешдиреген центрлар.

Докладчы оьзюню сёйлевюнде районну территориясында ерлешген, яшлар ял алагъан лагерлени 2022-нчи йыл ял алыв сезонгъа гьазирлиги гьакъда да толу баянлыкъ берип сёйледи. Демек, лагерлени яйлыкъ ял алыв сезонгъа гьазирлиги гьакъда комплекс тергев чаралар оьтгерилгенин малим этди. Ону сёйлевюнден ачыкъ болгъаны йимик, лагерлени ёлбашчылары токъташдырылгъан болжаллагъа санитар-эпидемиология ва Роспотребнадзорну, МЧС-ни талапларын яшавгъа чыгъарма герек.

Лагерлени къуллукъчулары хас уьйренивлерден чыкъма, ДР-ни МВД-ден тергелип, медосмотрдан оьтме борчлулар.

Районну территориясында ерлешген «Анжи-мастер», «Аист», «Парус» лагерлерде сменде 200 яш ял алма бола. Яшланы эки смен къабул этме гёз алгъа тутулгъан.

Гюлжанат Темирова чарада ­оьзюню сёйлевюн узата туруп, март айны 23-30 болгъунча оьтгерилген тергевлени натижасында арагъа чыкъгъан кемчиликлени де малим этди. Гьакъыкъатда, лагерлени Роспотребнадзорну , оьзге къурумланы талапларына жавап береген кюйде гьазирлиги бар. Базаланы материал-техника гьалы рази къалардай, уьйлер гьазир, тарыкълы алатлар булан таъмин. Къоркъунчлу кнопка ва видеокамералар ясандырылгъан, лагерлени айланасы бегилген.

Районну территориясында ерлешген ал алагъан лагерлени гьазирлиги 90-95 процент экенин, «Аист» лагерге барагъан ёлну ва газ быргъыны тетиклери барын да эсгерди.

Чараны ахырында оьзюню гьасил чыгъарып сёйлевюнде Магьмут Амиралиев оьзюню биринчи орунбасары Ибрагьим Абдулмежитовгъа бар кемчиликлени тайдырма тапшурув берди.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3