Къыставлу гюнлер

Бугюнлер районну малчылыкъ тармагъыны къуллукъчулары учун айрокъда бек къыставлу ва жаваплы заман. Районубузну къой къошларында тёл тюшюв кампания массовый кюйде башлангъан. Эсгерме герек, гетген йылны гюз, къыш айларыны ва бу йылны къышыны гьава шартлары гьайванчылыкъ тармагъыны къуллукъчулары учун онгайлы гетди. Шо себепден малланы семизлиги яман тюгюл.

Есликни гьар тюрлю къайдаларында иш гёреген къой къошларда буссагьатгъы вакътиде 41 мингден де къолай ана мал ва эчки сакълана.

Оьрде де эсгерип гетгенибиз йимик, къой къошларда тёл тюшюв башлангъан. Къой къошларда тёл тюшюв кампаниягъа мекенли кюйде гьазирлик гёрюлген. Айтагъаныкъ, авлакъда къозлагъан къозуланы аранлагъа гелтирмек учун транспорт, бир-бир къошларда ат арбалар къоллана. Баласын алмайгъан маллар гийирилеген клеткалагъа ремонтлар этилинген, къозулар сакъланагъан аранланы ичинде дезинфекция ишлер оьтгерилген.

Башлапгъы гьасиллер къуванчлы. Гьар ана малдан бир бала алынып, аман сакъланып тура.

Районну юрт хозяйство управлениесини касбучулары, оьзге авлакъ ишлени барышына йимик, къой къошларда тёл тюшюв кампанияны барышына да тергев этелер. Олар къойчулагъа оьз­лени къолундан гелеген кёмеклени эте, тармакъны къуллукъчуларына гьукуматны янындан этилеген якълавланы англаталар. Алдагъы гюнлерде УСХ-ны касбучулары Къарабудагъгент, Уллубийавул муниципал къурулувланы топуракъларында ерлешген къой къошларда ва башгъаларында болгъанлар, тел тюшювню барышына тергев этгенлер.

Бизин районну малчылыкъ тармагъында къачанда да бай сынаву булангъы ёлдашлар ишлеп гелген. Олар къойлардан бала алывда, гьар къойдан юн къыркъывда республика оьлчевдеги ярышларда даим гёрмекли ерлерде бола эдилер.

Бугюнлерде де сыйлы мердешлер узатыла. Бир-бир муниципал къурулувларда аты районгъа, республикагъа айтылгъан адамларыбызны авлетлери атасыны ёлун тутуп, оьзгелеге уьлгю болуп, ишлей. Шолайланы бири Гьели муниципал къурулувда «Мурат» деген КФХ-ны ёлбашчысы Жанбек Жанбековну эсгерме тарыкъ. «Мурат» деген КФХ районда малчылыкъ тармакъда жынслы маллар сакъланагъан предприятие гьисаплана.

Къарабудагъгент юрт муниципал къурулувда иш гёреген Абдуллатиповланы КФХ-сы да тёл тюшювге мекенли гьазирлигин гёрген.

Дёргели, Къурбуки, Губден муниципал къурулувланы топуракъларында иш гёреген сабанчы-фермер хозяйстволаны къой къошларында да тёл тюшюв къурумлу башлангъан ва юрюле.