Бизин газетге къошум этген

Латип Гьажакъаев 1960-нчы йылда Яхсай юртдагъы орта школаны битдирген. 1965-нчи йыл Магьачкъалада Ленинни атындагъы Дагъыстан Пачалыкъ университетни филология бёлюгюн уьстюнлю кюйде тамамлагъан. Ишлей туруп, 1976-нчы йылда КПСС-ни ЦК-сыны яныдагъы оьр партия школаны битдирген.

Латип Гьайбуллаевич оьзюню загьмат ёлун оьр охув ожакъны тамамлагъан сонг, 1965-нчи йылда Хасавюрт районну Яхсай юртундагъы орта школада рус тил ва адабиятдан дарс береген муаллим болуп ишлеген.

Гетген асруну 70-нчи йылларында Къарабудагъгент район газетде ишлеме яратывчу касбучулар етишмейген йылларда, район газетни баш редактору Магьаммат Салигьов ону бизин районгъа «Коммунизм ярыгъы» деген газетде ишлеме чакъыргъан. Латип Гьажакъаев шо йылларда Къарабудагъгент районда чыгъагъан район газетни бёлюгюню ёлбашчысы болуп загьмат тёкген. Ол районубузну социал-экономика оьсювюне, ватандашланы алгъа салынгъан планланы яшавгъа чыгъарывда, загьмат ругьун гётеривде аз буса да къошумун болдургъан ёлдаш.

Л.Гьажакъаев оьр къуллукъларда да чалышып гелген.

Демек, ДАССР-ни Министрлер Советини къурум бёлюгюню инструктору, ДАССР-ни Халкъ контролюну инспектору, Къаягент районда чыгъагъан «Коммунизмни байрагъы» деген район газетни баш редактору, Къызлар районда партияны район комитетини инструктору болуп ишлеген.

Латип Гьажакъаев Къызлар районда Урицкийни атындагъы совхозну директору, ДР-ни Пачалыкъ Советини ва Гьукуматыны Администрациясыны автохозяйствосуну баш инженери, директорну орунбасары, директору болуп загьмат тёкген. Буссагьатгъы вакътиде ол тийишли ял алывда.

2003-нчю йылдан берли Латип Гьажакъаев Россияны язывчуларыны Союзуну уьюрю. Къумукъ тилде язма башлагъан. Ону биринчи язывлары 1960-нчы йылларда «Ленин ёлу» газетде, «Дослукъ» альманахда ва «Утренняя заря», сонг орус тилде «Новое дело», «Молодёжь Дагестана», «Дагправда» ва оьзге газетлерде басмадан чыкъма башлагъан.

2000-нчи йылда Латипни ана тилде «Новый день» деген басмаханада «Айтылмагъан сёз» деген баш булан китабы чыкъгъан.

Ол «Обнаженное сердце», (2001й.) «Айтар сёзюм» (2002 й.) ва оьзге асарланы автору.

Биз, «Районну яшаву» район газетни коллективи, Л.Гьажакъаевни юбилейи булан ачыкъ юрекден къутлайбыз. Тенгирибиз къалгъан яшавунгда да къаркъаранга къатты савлукъ, шат яшав берсин!