Яшлыгъын дав бёлген...

Инг башлап охувчулагъа китапхананы къуллукъчулары дав йылланы яшларыны яшаву ва оланы игит­ликлери гьакъда хабарлады.

- Уллу Ватан давну къагьрулу йылларында уллулар булан бирче фашистлеге къаршы яшлар да ябушгъан. Охуп турагъан китапларын, сурат этеген альбомларын да ариге теберип, яш уланлар ва къызлар къолларына тюбеклер, гранатлар алгъан. Олар партизан отрядлар учун разведчиклени ишин кютген, уллуланы яннавурунда фабриклерде ва заводларда, уьлкени авлакъларында, фермаларда ишлеген, окоплар къазгъан. Жагьил, якълавчулар: «Бары зат фронтгъа! Бары зат уьстюнлюк учун!»-деген ой булан чалышгъан ва ябушгъан, игитликлер ва къоччакълыкълар гёрсетген…,- деп хабарлай А. Пашаева.

Сонг охувчулагъа Совет Союзну игитлери: пионерлер – Зина Портнованы, Лёня Голиковну, Дима Юрченкону, олай да оьзге атлары эсгерилмей къалгъан яш игитлени къоччакълыкълары гьакъда айтылды.

Охувчулар китапхананы къуллукъчулары гьазирлеген «В их детство ворвалась война» деген игит-пионерлени гьакъындагъы выставкагъа къарап чыкъды.

-Дав битгенли кёп йыллар гетсе де, шо къагьрулу, оьжетли давланы гьакъындагъы хабарлар бугюнде де тынглагъанланы юреклерин сызлата. «Дав», «террорчулукъ» деген сёзлени эшитсек, адамларыбыз, аявлуларыбыз саялы, юреклерибизни къоркъунчлукъ елей.

Гьар адам давда уллулар булан бирче кёп яш да оьлегенни билме герек, оьлмегенлери кёп къыйынлыкъланы гёрегенни, етим къалагъанны унутма ярамай! Яшлар буса яшама, сююнме ва сюйме тарыкъ. Яшлар яшамакъ учун тува! Уллулар шону унутма герек тюгюл! – дей район маданият бёлюкню ёлбашчысы Н.Мурзаева.

Чараны узата туруп, охувчулар яш игитлени къоччакълыкъларына багъышлангъан шиъруланы гёнгюнден охуду.