Газны, токну масъаласына къаралды

Районну башчысы Магьмут Амиралиев иш къуллукълагъа гёре, ДР-ни Гьукуматыны янына чакъырылып гетгенге гёре, чараны районну башчысыны биринчи орунбасары Ибрагьим Абдулмежитов ачды ва юрютдю. Ол залдагъылар булан саламлашып битген сонг, жыйылгъанлагъа жыйынны гюнлюк масъаласын малим этди.

Шо гюнгю жыйында районну халкъларын, теплица хозяйство булан доланагъан ёлдашланы тайышывсуз, таман даражада газгъа, токгъа бакъгъан къуллукъланы яхшылашдырмакъ учун 2022-2023-нчю ва сонггъу йылларда этилме герекли ишлени гьакъында сёз юрюлдю.

Бу масъалалагъа гёре районну башчысыны биринчи орунбасары Ибрагьим Абдулмежитов гьисап берип, районну юртларыны халкъларын, ябыкъ топуракъда овошлар оьс­дюрюв булан машгъул ёлдашланы 2022-2023-нчю йылларда ва гележекде газгъа, токгъа бакъгъан талапларын яхшылашдырмакъ муратда ПАО «Газпром» ва ПАО «Россети Северный Кавказ – Дагэнерго» филиал булан районда этме герекли ишлени ачыкълашдырып сёйледи.

Ону сёйлевюнден ачыкъ болгъаны йимик, районну газ хозяй­ствосунда кёп тетиклер бары 70-нчи йылларда оьзтёрече гележекни гьисапгъа алмай тюрлю-тюрлю базыкълыгъы булангъы быргъылар булан тартылгъанын, шо гьалдагъы быргъылагъа таман даражада басылыв берме болмайгъанын аян­лашдырды.

Газны гьакъында сёзюн давам эте туруп, И.Абдулмежитов районну юртларындагъы ГРС-лер, авуллардагъы газ шкафлар да районну газгъа бакъгъан талапларын кютювге толу жавап бермейгенин яшырмады.

Чарада И.Абдулмежитовну сёзлерине гёре районну башчысы М. Амиралиев юртланы ватандашларын, ябыкъ топуракъда овошлар оьсдюрюв булан машгъул предприятиелени таман даражада газ булан таъмин этивню яхшылашдырмакъ, масъаланы чечмек муратда кёп гьаракат этип турагъанын айтды.

Докладчыны сёйлевюнден ­ачыкъ болгъаны йимик, районда газны масъаласын ёрукълу чечмек учун оьрде токътагъан къурумлар бирликде районну территориясында иш ресурслары битген, топуракъны тюбюнден салынгъан, сюрюкме имканлы ерлерден тартылгъан быргъыланы онгарма, ГРС-ни гючюн артдырма, шкафланы санавун артдырма тарыгъы гьакъда санавлар гелтирип сёйледи. Умуми алгъанда, И.Абдулмежитов айтагъан кюйде, 2022-2023-нчю йыллагъа юртланы ичиндеги гьар-тюрлю базыкълыкъдагъы 165 километр быргъыгъа реконструкция этме тарыкъ.

Докладчы оьзюню сёйлевюнде районну юртларын ток булан таъмин этивню яхшылашдырмакъ муратда 2022-2023-нчю йылларда районну электрохозяйство къуруму оьзлени гючю булан яшавгъа чыгъарма гёз алгъа тутгъан ишлени де ачыкъ­лашдырды.

2022-2023-нчю гюз-къыш айлагъа гьазирлик гёре туруп, райэлектросет хозяйство къайда булан 144 агъач багъананы орнуна, темир-бетон къатыш багъаналар салма 47 ТМ-3; 97 ТМ-1 травеслени алышдырма, кёп-кёп оьзге къуралланы янгыртма къаст салынгъанын эсгерди.

И.Абдулмежитов оьзюню сёйлевюню ахырында районну электрохозяйствосун янгыз РЭС-ни гючю булан аякъгъа тургъузма къыйын, масъалаланы ёрукълу чечмек учун ПАО «Россети Северный Кавказ – Дагэнерго» подряд къурумланы къуршап кютмесе, дагъы ёл ёкълугъун айтды.

Жыйында гётерилген масъалагъа гёре районну юрт хозяйство управлениесини ёлбашчысы Ш.Мустапаев де чыгъып сёйледи. Ону сёзюнден ачыкъ болгъаны йимик, 2030-нчу йыл­гъа районда ябыкъ топуракъда 885 гектарда овошлар оьсдюрювге етишме гёз алгъа тутулгъан.

Шо саялы, оьрдеги къурумлар булан районда газны масъаласы ёрукълу чечилмесе, дагъы чечме гюч ёкъ,- деди ол.

Жыйын тамамлана туруп, залгъа районну башчысы М.Амиралиев де гелип къалды. Чараны юрютмесе де, шо гюн арагъа салынып ойлашылгъан газны, токну масъаласын чечмек учун ол белсенип, юртланы башчыларына, оьзге къуллукъланы ёлбашчыларына тапшурувлар берип, оланы яшавгъа чыгъывуна къатты тергев этип юрюй.

Бу гезик де М.Амиралиев районну юртларында «догазификация» программаны имканлыкъларындан пайдаланып, юртланы микрорайонларын газлашдырмакъ учун юрюлеген гьаракатны, юртланы башчылары онгаргъан заявкаланы гёзден гечирди, бир-бир юртланы башчыларына гёрсетивлер берди.