«Ана тилинг сюй, сыйла!»
Белгили кюйде, январ айны 21-нден февраль айны 21-не ерли, бары да ерлерде йимик, бизин районну юртлуларында да ана тилни айлыгъы белгилене. Шогъар гёре юрт ва школа китапханаларда, школаларда ана тилге багъышланып тюрлю чаралар оьтгериле.
Шолай, январ айны ахыр гюнлеринде Дёргели юрт китапханада «Ана тилинг сюй, сыйла!» деген баш булан Ана тилни айлыгъына багъышлангъан чара оьтгерилди.
Чарада юрт китапхананы актив охувчулары Х.Муталимова «Ана тилим, алтын тилим, бал тилим», Ф.Абдуллаева «Улан давгъа гетгенде», З.Жоуллаева «Азиз анам», Р.Алиева «Къумукъ тилим» деген къумукъ шаирлени шиъруларын гёнгюнден охудулар.
Чараны узата туруп, Дёргели 1 номерли орта школаны охувчулары «Ана тил – алтын ачгъыч» деген адабият монтажны гёрсетди.
Дёргели юрт китапхананы ёлбашчысы Айшат Изиева ана тилни асиллиги гьакъда хабарлагъан сонг, оьзлени юртундан чыкъгъан къумукъ шаирлер Къурманали Шамсутдиновну, Магьамматсайит Маликовну, Абдулвагьап Межитовну яратывчулугъу гьакъда маъналы лакъыр этди.
Сёз берилген Дёргели 1 номерли орта школаны муаллими Илмугьаят Жоуллаева бизин ана тилибиз – тенгсиз байлыкъ экени гьакъда айта туруп, охувчуланы ана тилибизни, анабызны йимик, сюйме ва аявлама герек экенибиз гьакъда айтды. Охувчуланы ана тилде чыгъагъан газетлени, журналланы ва китапланы охума, ана тилинде сёйлемеге ва ана тилин сюйме чакъырды.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
