Уьлгюлю яшав ва загьмат

Ш.Шагьманаевни загьмат ёлларына багъышлангъан «Жил человек по совести» деген газет-журнал выставкагъа къарап чыкъгъан сонг, ёлугъувну ортакъчылары ерлешип олтурдулар.

Ёлугъувда Къарабудагъгент районну тамазаларыны Советини председатели А.Мамагишиев, Къарабудагъгент 1 номерли орта школаны муаллимлери ва охувчулары, музейни ва китапхананы къуллукъчулары, китапхананы актив охувчулары ортакъчылыкъ этди.

Чараны ачгъан районну маданият ва туризм ишлеге къарайгъан бёлюгюню ёлбашчысы Н.Мурзаева ­«Юртну белгили адамлары» деген проектге гёре юрюлеген чараланы ролю гьакъда сёйледи.

-Гьар юртда иши, яшаву, къайратлы загьматы булан белгили болгъан, уьлгюлю гьызын къойгъан адамлар кёп бар. Юртлуланы, охувчуланы биз оланы яшав ва загьмат ёллары булан таныш этме сюебиз, олардан уьлгю алма, олагъа ошамагъа чакъырабыз.

Шолай адамлар оьзлер де билмейген кюйде оьзлени загьматы булан элибизни гележеги учун гёрмекли къошум этген.

Гьар адам оьзюню яшавунда юрту, эли учун къолундан гелеген ишни этме де герек. Юртлулар буса шолай загьмат тёкгенлени билме де, яшёрюмлеге билдирмеге де борчлу…,- дей ол.

Сонг сёйлеген Къарабудагъгент юрт китапхананы баш китапханачысы А.Пашаева Къарабудагъгент юрт­ну белгили адамларыны бири – ­Шагьманаев Шагьманай Жалаловични яшав да загьмат ёллары гьакъда хабарлады.

- Ш.Шагьманаев юртлуланы яшаву яхшы болсун деп кёп иш этгенлени бириси. Ол бек низамлы адам, элин-юртун сюеген, халкъы учун загьмат тёкген патриот… Къайда ишлесе де, не ишни башын тутса да, Ш.Шагьманаев оьзюню ишге жавапчылыгъын ва талаплылыгъын гёрсетген, шону булан бирче, айланадагъыланы къыйынын-тынчын англама, олагъа болагъан кёмегин этме, тарыкъ болса, якъламада гьазир тургъан,-деп хабарлай Ш.Шагьманаевни гьакъында районну тамазаларыны Советини председатели А.Мамагишиев.

Уллуланы сёйлевлерине тынглагъан охувчулар Ш.Шагьманаевни яшаву ва загьматы гьакъда тюрлю соравлар берип, олагъа жаваплар алды. Олай да, олар оьзлер билеген юртну белгили адамланы гьакъында да соравлар берди ва хабарлады.

Чараны узата туруп китапхананы охувчулары Ш.Шагьманаевге багъышлап оьзлер яратгъан шиъруланы гёнгюнден охудулар.