Гюзлюклени масъаласы

Ону сёйлевюнден ачыкъ болгъан кюйде, уьлкени оьзге регионларында йимик, бизин районда да коронавирус инфекция аврув янгыдан жанланып геле.

Айтагъаным, коронавирусдан авруйгъанланы санаву гюн сайын гётериле.

«Шо саялы биз аврувну алдын алыв чараланы гючлендирме герекбиз»,- дей М.Амиралиев.

Сонг аслу масъалагъа байлавлу маълумат бермек учун районну башчысы районну юрт хозяйство управлениесини ёлбашчысы Шагьабутдин Мустапаевни сагьнагъа чакъырды.

Ш.Мустапаев оьзюню сёзюн булай башлады:

- Районну загьматчылары ватандашланы сурсат аманлыгъын болдура туруп, артдагъы йылларда кёп майданлагъа къылчыкълы ва язлыкъ­ ашлыкълар чачалар ва гёрмекли натижаланы къолда эте де гелелер. Шогъар, озокъда, авлакъчыларыбызны, механизаторларыбызны ва оьзге касбучуларыбызны къайратлы загьматындан къайры да, артдагъы 2-3 йылны ичинде табии гьава шарт­лар да болушлукъ этди. Гьакъыкъатда, 2020-2021-нчи йылларда авлакъчыларыбыз гюзлюк къылчыкъ­лы ашлыкъланы гьар гектарындан орта гьисапда 22 центнер, язлыкъ къылчыкълы ашлыкъланы гьар гектарындан буса 20 центнерден бираз къолай тюшюм къайтарма бажардылар.

Бизинки йимик къургъакъ зонагъа шо яхшы гьасил.

Бу йылны тюшюмю учун гюзлюк, язлыкъ къылчыкълы ашлыкълар чачылагъан сабанлыкъларыбызны майданларын генглешдирме гьаракат этип ишлер юрюле.

2022-нчи йылны тюшюмю учун, гетген гюзде бары имканлыкъларыбызны къоллап, план булангъы 10730 гектарны ерине 10922 гектаргъа гюзлюк къылчыкълы ашлыкълар чачылды. 2021-нчи йыл чачылгъанындан эсе, шо 1 минг гектаргъа артыкъ.

Топуракъланы асувлу къоллавгъа Губден, Къурбуки, Гьели, Къарабудагъ­гент юрт муниципал къурулувларда жаваплы янашалар.

Бу йылны тюшюмю учун районда чачылгъан къылчыкълы гюзлюк ашлыкъланы 80 процент майданлары шо оьрде атлары эсгерилген юрт муниципал къурулувларда ерлешдирилген.

«Гьели юрт» муниципал къурулувну сюрюв топуракъларыны 75 процентинде гюзлюк ашлыкълар ерлешдирилген.

Докладчыны сёйлевюнден ­ачыкъ болгъаны йимик, районну хозяйстволары бу йылны тюшюмю учун гюзлюклер чачыв кампанияны къурумлу ва сан янлы кюйде тамамлагъан.

Ш.Мустапаев оьзюню сёйлевюнде, гюз чачывну гьакъында сёзюн узата туруп, бу йылны тюшюмю учун 600 гектар майданлагъа оьр сортлу (элита) урлукъ чачылгъанын эсгерди. Онгайлы шартлар болса, шо майданларда 1,5 минг тон 1-нчи репродукциялы урлукъ будай къаравуллайгъанын аян этди.

Чарада сёзюн тамамлай туруп, Ш. Мустапаев районну муниципал къурулувларында язлыкъ къылчыкълы ашлыкълар чачывгъа гьазирлик гёрювню, шо муратгъа гёре сюрюлген топуракъланы майданларын, районда бар урлукъланы запасларын малим этди.

Буссагьатгъы вакътиде гюзлюк­лерибизни гьалы, чыгъыву яман тюгюл. Бираз гечигип чачылгъан участкалар гьали чыгъып геле. Олай участкаларыбызны къадары (майданлар) кёп тюгюл. Районну хозяйстволарыны ёлбашчыларына чачывланы зиянлы жанлардан къорума, азыкъландырмакъны гьайын этме тюше,- деди Ш. Мустапаев.

Чарада гьасил чыгъарып сёйлевюнде М. Амиралиев районну тийиш­ли къуллукъларына республикада иш гёреген гьар тюрлю программаларда жавапчылыкъны гьис этип актив кюйде ортакъчы­лыкъ этме тапшурувлар берди.