Оперштабны генгеши

С.Меликовну сёзлерине гёре, янгы йылгъа байлавлу байрам гюнлени вакътисинде эпидемия гьалны ёрукълашдырмагъа бажарылгъан. Шо саялы да, ол инг башлап, медицина къуллукъчуланы, олай да, Роспотребнадзорну ва МВД-ни къуллукъчуларына шо ишде тергев болдургъаны саялы, разилигин ва баракалласын билдирди. Ону булан янаша муниципал къурулувларда адамланы вакцина этдирив бир къадаргъа артгъанын да ол аян этди.

Бугюнлерде республикада шолай аврувлар учун 2000 койка ер онгарылгъан, койка фондну запасы 22 процент. С.Меликов шо даражаны сакъламагъа чакъырды. Аврувну «омикрон» журасы бизин уьлкебизде де яйылмагъа башлагъанны ол яшырмады. Шону алдын алмакъ учун чаралар гёрмеге чакъырды.

Тест оьтгеривню гьа­къында республикабызны ёлбашчысы айрыча эсгерди. Масала, 100 минг адамгъа 316 тест ахтарыв оьтгериле. Шо даража дагъы эниш болмагъа ярамайгъанын ол ачыкъ этди.

Генгешни барышында ДР-ни Башчысы С.Меликов вакцина этдиривню барышы гьакъда маълуматлар гелтирди. Демек, январ айны башлапгъы 10 гюнюнде 60 минг адам вакцинаны этдирген. Шо буса, декабр ай булан тенглешдиргенде, 2 керенге артгъан.

РФ-ни савлукъ сакълав министерлигини маълуматларына гёре, вакцина этдиривню барышы артдагъы жуманы ичинде, савлай элибиз булан тенглешдиргенде, бизин республикабыз лап да ал сыдрада токътагъан. С.Меликов вакцина этдиривню барышын шу гьалда юрютмеге тапшурду.

Республиканы гьакимбашы эсгерген кюйде, февраль айны 1-не республикабызны умуми халкъыны 60 проценти вакцина этдирмеге герек. Январ айны 10-на буса шо чараны даражасы – 46 процентге етишген. Сергей Меликов муниципал къурулувланы башчыларына гёз алгъа тутулгъан планны яшавгъа чыгъармагъа тарыкъ­лыгъын ташдырды.

Ватандашланы арасында коллектив иммунитетни болдурмакъ учун QR-кодлар болмагъа ва оланы талап этмеге тарыкълыгъын эсгере туруп, С.Меликов Роспотребнадзорну къуллукъчулары 2021-нчи йылны ноябр-декабр айларында шагьарларда ва районларда тергевлер болдургъанын ачыкъ этди. Тергевлер исбат этеген кюйде, иш гёреген 700 идараны уьчден бир пайы санитар-эпидемия талапланы бузгъанын айтды. Шоллукъда, 100 протокол язылгъан, 515 предписание йиберилген ва 40 идараны чалышыв иши токъталгъан.

Генгешни барышында Рос­потребнадзорну ДР-деги Управлениесини ёлбашчысы Николай Павлов эсгерген кюйде, январ айны 11-не республикада 67 минг адам коронавирус аврувдан авруй деп токъташдырылгъан. Артдагъы гюнню ичинде 111 адамны авруву ачыкъ этилген.

Республиканы 24 муниципал къурулувунда коронавирус аврувну яйылыву ёрукълашдырылгъан, 6-нда – бирев де аврумагъан ва 8-нде – авруйгъанланы санаву артгъан. Ону сёзлерине гёре, авруйгъанлар кёбюсю гьалда шагьарларда яшай ва оланы оьмюрчагъы 30-59 йыл. Генгешни барышында ачыкъ болгъан кюйде, январ айны 11-не савлай республикабызда 842 минг 909 адамгъа вакцина этилген.

ДР-ни савлукъ сакълав министрини заманлыкъгъа борчларын кютеген Татьяна Беляеваны сёзлерине гёре, январ айны 10 гюнюнде коронавирус аврув булан 1064 адам авругъан, 825 – больницадан чыкъгъан ва 36 – гечинген. Ол эсгерген кюйде, республикабызны больницаларында коронавирус булан авруп ятгъан 35 яш ва 27 айлы къатын бар. Т.Беляева айлы къатынлар вакцинаны лап аз этдирегенин эсгерди. Вакцина яшгъа ва ону анасына зарал этмейгенин ол бирдагъы керен ачыкълашдырды.

Генгешни ахырында ДР-ни Башчысы Сергей Меликов эсгерген кюйде, янгыз вакцина этдирив булан коронавирус аврувну яйылывуну алдын алмагъа бола. Шо саялы да, С.Меликов шагьарланы ва районланы башчыларын шо ишге бирдагъы керен къуршалмагъа ва тюзевлю янашмагъа чакъырды.

Видеоконференция байлавлукъ къайдада оьтгерил­ген республиканы оператив штабыны генгешинде Къарабудагъгент районну башчысы Магьмут Амиралиев де оьзюню ортакъчылыгъын болдурду.