Меню
16+

Сетевое издание "Району яшаву"  «Будни района»

03.09.2021 11:18 Пятница
Категории (2):
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Билимлеге абат алынды

Автор: Багьавутдин Самадов

Адатлангъан кюйде, гьар йыл сентябр айны 1-нде Россияда Билимни гюню белгилене. Шоллукъда, шо гюнге байлавлу болуп, уьлкебизни бары да шагьарларында ва юртларында ерлешген охув ожакъларда байрам чаралар оьтгериле.

Билимлени гюнюнде яшлар бавларына барагъан гиччипавлагъа, школалагъа юрюйген охувчулагъа, орта хас ва оьр охув ожакъларда билим алма чалышагъан студентлеге, оланы барысыны да билим береген тарбиялавчуларына, муаллимлерине ва дарс беривчюлерине айрыча тергев бериле, оланы атына къутлавлар ва лайыкълы сёзлер айтыла.

2021-2022-нчи охув йылда Дагъыстан уьлкебизде 1-нчи класгъа абат алгъан охувчуланы санаву 47 мингге етише. Бизин Къарабудагъгент районубуздагъы школалагъа биринчи абатын алгъан охувчуланы санаву 2 мингден айлана. Демек, олар учун яшавну янгы канзиси башлана. Олар билимлени дюньясына чомула, гьар тюрлю дарсларда гезей, ахтара, билимли ва англавлу бола.

Артдагъы йылланы ичинде билим ожакъланы материал-техника базасы яхшылашдырылагъанына барыбыз да шагьатбыз. Демек, районубузну ичинде янгы яшлар бавлары ва школалар къурула ва дагъы да къурулмагъа гёз алгъа тутулгъан. Шоллукъда, 1-нчи сентябрде районубузну ичиндеги бары да школаларында Билимни гюнюне багъышлангъан шатлы чаралар ­оьтгерилди. Шо чараларда юртланы башчылары, депутатлар, жамият чалышывчулар, гьюрметли адамлар ва охувчуланы ата-аналары, дос-ювукълары оьзлени ортакъчылыгъын болдурдулар.

Къарабудагъгент гимназияда

Къарабудагъгент гимназияда оьтгерилген Билимлени гюнюне багъышлангъан шатлы чарада ДР-ни печат ва маълумат министри Умаросман Гьажиев, «Къарабудагъгент район» муниципал районну башчысы Магьмут Амиралиев, ДР-ни Халкъ Жыйыныны депутаты Магьамматали Адзиев, «Къарабудагъгент район» муниципал къурулувну Жыйыныны ёлбашчысы ва Къарабудагъгент гимназияны директору Адил Салаватов, Къарабудагъгент юртну гьакимбашы Магьамматсолтан Гьасанов ва оьзге ёлдашлар ортакъчылыгъын болдурдулар.

Шатлы чараны юрютювчюлер инг башлап майданчагъа биринчи класгъа гелген охувчуланы ва оланы клас ёлбашчыларын чакъыргъан сонг, Россияны пачалыкъ гимни согъулду.

Сонг сёз берилген Къарабудагъгент гимназияны директору Адил Салаватов оьзюню къутлав сёзюнде муаллимлеге ва охувчулагъа савлукъ, чыдамлыкъ, герти къурдашлар ва уьстюнлюклер ёрады. Олай да, гимназиягъа гьар даим кёмегин болдурагъан районну администрациясыны башчысы Магьмут Амиралиевге ва ­оьзге къуллукъчуларына баракалласын билдирди.

Ондан сонг сёйлеген районну башчысы Магьмут Амиралиев оьзюню сёзюнде булай айтды:

- Гьюрметли муаллимлер ва охувчулар, школагъа биринчилей абатын алагъан биринчи класланы охувчулары ва ата-аналар! Сизин барыгъызны да етишип гелген Билимлени гюню булан гьакъ юрекден къутлай туруп, оьтген къыйынлы йылны эсгермеге сюемен. Айтагъаным, 2021-нчи охув йылны ахырында школаларда билим алагъан яшларыбыз уьйден туралы (дистанционно) охумагъа борчлу болдулар. Шогъар да себеп – савлай дюньяны елеген коронавирус аврув эди. Озокъда, бир класда олтуруп, гьар гюн бирев-бирев булан къатнап, кюлеп-ойнап турагъан яшлагъа уьйде къамавда къалмагъа ва шо къайдада билим алмагъа нечакъы да къыйын болгъандыр.

Шо коронавирус аврувну алдын алмакъ ва токътатмакъ учун бизин докторларыбыз ва алимлерибиз вакцина этмеге борчлу болду. Шо вакцина этилсе, адамланы авруйгъан санаву аз болагъаны ва аврувну гьалы яхшы болагъаны токъташдырылгъан. Школада яшны билим алывуна тюгюл, гьатта савлай яшавуну кюрчюсю салына. Шо саялы да, муаллимлеге ва охувчулагъа чыдамлыкъ ва уьстюнлюклер ёрайман.

Сонг сёз берилип сёйлеген ДР-ни печат ва маълумат министри Умаросман Гьажиев оьзюню сёйлевюнде школада охуйгъан яш йылларын эсине алды. Ол да школаны ичинде адам ­оьзюню яшавунда биринчилей билим ва сынав алагъанын ачыкъ этди. Демек, шолар адамны яшавунда лап да тарыкълы затлар.

Къарабудагъгент гимназияда оьтгерилген шатлы чараны барышында, озокъда, биринчи класгъа абат алгъан охувчулар оьзлени шиъруларын охуду, школаны башгъа охувчулары йырларын ва чыгъышларын къонакълагъа ва къаравчулагъа савгъат этдилер.

Гимназияда 2021-2022-нчи охув йылны башланывуна багъышлангъан Биринчи зенгни къакъмагъа 11-нчи класны охувчулары Карима Алчагъыровагъа ва Ибрагьим Ибрагьимовгъа, олай да 1-нчи класны охувчулары Хадижа Гьажиевагъа ва Фатима Ягьияевагъа ихтияр берилди.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

4