Жыйын жанлы оьтгерилди

Жыйынны юрюшюнде район администрацияны башчысыны орунбасары Жалалутдин Жамалутдинов, Къарабудагъгент юрт администрациясыны ёлбашчысы Магьамматсолтан Гьасанов, район больницаны баш врачы Расул Гьиравов, районда тамазаланы къурумуну ёлбашчысы Абдулгьамит Мамагишиев ёлдашлар да ортакъчылыкъ этдилер. Штабны жыйынын юрт администрацияны башчысы Магьамматсолтан Гьасанов ачды ва юрютдю. Ол оьзюню гиришив сёзюнде штабны уьюрлери аврувну алдын алмакъ учун юртдагъы тюкенлеге, идаралагъа, халкъ къатнашагъан ерлеге рейдлер булан баргъаны, халкъны арасында этилген англатыв ишлени гьакъында жыйыл­гъанлагъа билдирди. Сонг район больницаны баш врачы Расул Гьиравовгъа сёз берилди. Расул Гьиравов оьзюню сёйлевюнде коронавирусдан авруйгъанланы санаву гюн-гюнге артып гелегенин эсгерди. Авруйгъанланы кёбюсю Къарабудагъгент юртдан экенлигин де жыйылгъанлагъа айтып билдирди. Шо саялы да юртлу ватандашланы вакцинадан тартынмайлы гелип тезликде вакцин этдирмеге чакъырды.

Биз, врачлар, шо вакцинаны, таза гьаваны кислород артын уьзмейли болдурмакъны гьайын этежекбиз, деди ол.

Къарабудагъгент 2 номерли орта школаны директору Гьалимат Гьарумова, къурулуш материаллар сатагъан тюкенни ёлбашчысы Абдулмуслим Самадов, район билим берив управлениени ёлбашчысы Тажли Хизриева ва олай оьзге ёлдашлар штабны гезикли жыйынын юрютювчюлеге хыйлы соравлар бердилер ва шолагъа тийишли жавапларын да алдылар. Сонг гьасил чыгъара туруп сёйлеген Жалалутдин Жамалутдинов, Абдулгьамит Мамагишиев жыйынны ортакъчыларын вакцина этдиривге байлавлу къабул этилинген къарарланы тайышывсуз юрютмекни гьайында турмагъа ва ёрукълу ­оьтгермеге чакъырдылар.