Меню
16+

Сетевое издание "Району яшаву"  «Будни района»

27.08.2021 10:00 Пятница
Категории (2):
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Вице-премьер бизин районда

Автор: Багьавутдин Самадов

Август айны 20-сында ДР-ни Гьукуматыны ёлбашчысыны орунбасары Манвел Мажонц иш сапар булан бизин районда болду. Шо иш сапарында ол бизин районну газ ва ярыкъ булан таъмин этив ва социал объектлени къурув гьакъда генгеш оьтгерди.

ДР-ни Гьукуматыны ёлбашчысыны орунбасары Манвел Мажонцну шо иш сапарында ДР-ни энергетика ва ЖКХ министрини орунбасары Теймур Салаватов, капитал къурулуш управлениени ёлбашчысыны орунбасары Айдемир Исмайылов, ДР-ни промышленност ва сатыв-алыв министрини орунбасары Низам Халилов, олай да «Газпром трансгаз Махачкала» ООО-ну ёлбашчысы Александр Астанин, «Россети Северный Кавказ-Дагэнерго» ПАО-ну бёлюгюню ёлбашчысы Магьаммат Абдурашитов ва «Газ­пром межрегионгаз Махачкала» ООО-ну ёлбашчысыны кёмекчиси Гьасан Гебеков узатдылар.

Республиканы даражасында районгъа иш сапар булан гелген гьюрметли къонакъланы Къарабудагъгент районну башчысы Магьмут Амиралиев ва оьзге жаваплы къуллукъчулар къаршыладылар.

Шо сапарында олар Уллубийавулну памидор оьсдюреген теплицаларында болдулар. Олар теплицаланы есилери булан этген лакъырында ачыкъ болгъан кюйде, быргъылардагъы газны басылывуну (давление) къыш вакътиде оьлчевюн гётермекни гьайын этежек. Шоллукъда, къыш вакътиде таман чакъы газ болмагъа тарыкъ.

Олай да, гьюрметли къонакълар булан бирче районну администрациясыны ёлбашчылары Къарабудагъгент юрт постну янындагъы къурулгъан янгы яшлар бавуна бардылар. Эсгерилген яшлар баву сентябр айны 1-нде оьзюню эшиклерин ачмагъа ва 250 гиччипавну къабул этмеге гьазир.

Сапарны ахырында ону ортакъчылары район администрацияны бинасында гьасиллерин чыгъармакъ учун генгеш оьтгердилер. Шо генгешни барышында Къарабудагъгент районну газлашдырыв ва ярыкълашдырыв масъалаларына къаралды ва шоланы тезликде чечмек учун таклифлер берилди.

Къарабудагъгент районну гьакимбашы Магьмут Амиралиев ДР-ни Гьукуматыны ёлбашчыларына, олай да газ ва ярыкъ бирлешивлени жаваплы къуллукъчуларына районну халкъын газ ва ярыкъ булан тийишли даражада таъмин этмекни ва оьзге масъалаларын ювукъ арада чечмекни тиледи.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

6