Меню
16+

Сетевое издание "Району яшаву"  «Будни района»

20.08.2021 09:29 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Арагъа салынып ойлашыла

Автор: Багьавутдин Самадов

Арбагюн, 18-нчи августда, Къарабудагъгент районну башчысыны иш кабинетинде районну ичиндеги газ къоллавчу абонентлени ва идараланы 2021-нчи йылны 4-нчю кварталында оьтгерилмеге гёз алгъа тутулгъан тергев чараланы гьакъында генгеш оьтгерилди.

Генгешни ишинде районну башчысы ­Магьмут Амиралиев, Россияны МВД-сини райондагъы бёлюгюню ёлбашчысыны орунбасары Руслан Халдузов, «Газпром межрегионгаз Махачкала» деген ООО-ну райондагъы территория участкасыны ёлбашчысы Набиюлла Агъабеков, олай да «Газпром межрегионгаз Махачкала» ва «Газпром межрегионгаз инжиниринг» деген ООО-ланы жаваплы къуллукъчулары Алексей Польщиков, Александр Курышев ва Андрей Хохлов ортакъчылыкъ этдилер. Сонг да, генгешни барышында районну теплица хозяйстволарыны ассоциациясыны ёлбашчысы Мурат Абуев ва юрт­ланы башчылары оьзлени ортакъчылыгъын болдурду.

Генгешни аввалында районну гьакимбашы М.Амиралиев районну ичиндеги газ къоллавчуланы лап да аслу ва итти масъаласыны гьакъында айтды. Демек, къышлыкъ сезонда теплица хозяйстволагъа, олай да газ къоллавчу абонентлеге газ етишмейгенин эсгерди.

М.Амиралиевни сёзлерине гёре, газ быргъылардагъы газны басылывун артдырмакъ учун ГРС-лени алышдырмагъа герек. Олай да, оьзюню сёзюнде ол газны къоллайгъан абонентлер ва далапчылар газгъа гьагъын тёлемеге гьазир экенлигин ачыкълашдырды.

«Газпром межрегионгаз Махачкала» ва «Газпром межрегионгаз инжиниринг» деген ООО-ланы жаваплы къуллукъчулары оьзлени сёйлевлеринде берген баянлыкълагъа гёре, сентябр айны 30-ндан декабр айны 30-у болгъунча шоланы къуллукъчулары районну ичинде газны къоллавда ва огъар тёлевлер болдурувда йиберилген кемчиликлени алдын алмакъ муратда иш гёрежегин ва чаралар юрюлежегин аян этдилер.

Ачыкълашдырып айтгъанда, бары да идаралагъа ва къурумлагъа инвентаризация оьтгерилежек. Газны къоллайгъан абонентлеге буса шолай тергевлер сайланып болажакъ. Озокъда, абонентлер шо гьакъда алданокъ билдирив кагъызлар алажакъ.

Газ бирлешивлени вакиллерини сёзлерине гёре, уьч айны узагъында оьтгерилежек тергевлени ва оьзге хас чараланы аслу мурады – газ быргъыланы ва газны къоллавну гьалын ва даражасын ичинден билмек.

Генгешни барышында районну теплица хозяйстволарыны ассоциациясыны ёлбашчысы М.Абуев оьзюню сёйлевюнде берилеген газны сан яны ва басылыву осал экенлигин айтгъан сонг, 2021-нчи йылны ахыры болгъунча олардан газны тайдырмай къоймакъны тиледи. Неге тюгюл де, олар бугюнлерде памидордан гелим алмакъ муратда чачыв ишлерин юрютген ва шо вакътилерде теплицаларда тереклер гелим бермеге башлажакъ. Газны сёндюрсе, гелим тас болажагъын ол ачыкълашдырды.

Районну гьакимбашы М.Амиралиев теплица хозяйстволаны ассоциациясыны ёлбашчысы М.Абуевни тилевлерин ва таклифлерин къабул эте туруп, газ бирлешивлени жаваплы къуллукъчуларына далапчыланы ­загьматын ва харжын негьакъ болдурмайлы, оланы якъламагъа чакъырды.

Оьтгерилген генгешни ахырында, ону ортакъчылары къабул этген протоколгъа гёре, 2021-нчи йылны артдагъы 3 айыны узагъында районну ичинде газ къоллавчуланы борчларына ва тёлев­лерине инвентаризация этилежек, газ бирлешивлени жаваплы къуллукъчулары газны басылывун токъташдыражакъ. Олай да, район администрацияны янындан борчлары бар адамлагъа кёмек болдурмакъ учун районну газ абонент къуллугъуна юрист гёрсетилежек, УЖКХ-ны жаваплы къуллукъчулары ФИАС системагъа гёре районну ичиндеги бир нече юртда бир нече газ къоллайгъан абонентлени адреслерин тергежек.

Озокъда, шу оьрде эсгерил­ген чараланы юрютмек ва яшавгъа чыгъармакъ учун полицияны къуллукъчулары да къуршалмагъа гёз алгъа тутула.

Жамиятны арасында ­англатыв ишни юрютмек учун ерли масса маълумат къуралланы вакиллерине шо гьакъда макъалалар язмагъа тапшурулду.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3