Вакцина этив узатыла

Савлай дюньяда биринчилерден болуп, Россияны алимлери ва врачлары коронавирус аврувгъа къаршы «Спутник V» деген вакциананы этмеге бажарды. Шо вакцинаны сан яны бар экенлиги гьакъда халкъара медицина журналлар оьз­лени бетлеринде макъалалар язып да чыгъарды.

2021-нчи йылны январ айындан тутуп, бизин уьлкебизде коронавирус аврувгъа къаршы вакцинаны этив чара башлангъан ва юрюлюп тура. Шо гьакъда РФ-ни Президенти Владимир Путин оьзю айтып билдирди.

Бугюн-буссагьат россиялы алимлер ва врачлар чыгъаргъан 4 тюрлю вакцина бар. Шоланы къайсы да адамлагъа зарал этмей деп эсгериле. Шо вакциналаны арасында «Спутник V» деген вакцина адамлагъа лап да кёп этиле.

РФ-ни масса маълумат къураллары билдиреген кюйде, вакцинаны эки де оьлчевюн алгъанланы санаву 16 процентге етише. Шо буса оьзге пачалыкълар булан тенглешдиргенде, нечакъы бола буса да аз. Масала, Англияны, Израильни, Бирлешген Арап Эмиратланы ва оьзге Европадагъы пачалыкъланы ватандашларыны 60-70 проценти вакцина алгъан деп билдириле.

Вакцина этив чара Дагъыстан республикабызда да айтардай оьр даражада оьтгерилмей. Шону уьстюнде республикабызны ёлбашчылары да иш юрютюп тура.

Олай да, муна бугюнге бизин районубузда вакцина этгенлени санаву 4 мингге етишген. Умуми алгъанда, 85 мингден оьтген адам яшайгъан районгъа 4 минг адам вакцина этмек нечакъы бола буса да аз. Алимлер ва врачлар билдиреген кюйде, коронавирус аврувну яйылывун токътатмакъ ва шону алдын алмакъ учун халкъны 60 проценти сама вакцина этмеге герек. Демек, шолай этилсе, авруйгъанланы санаву аз болажагъы ва аврувну токътамагъа имканлыкъ болажагъы мекенли.

Районну гьакимбашы Магьмут Амиралиев район администрацияда оьтгерилеген генгешлерде ва юртларда оьтгерилген оьзге ёлугъувларда коронавирус аврувну гьакъында ва шону алдын алмакъ учун гёрюлмеге тарыкълы чараланы гьакъында мекенли кюйде англатыв этип ва таклифлер берип тура.

Магьмут Амиралиев гьар даим халкъны савлугъуну гьайында турагъанын исбатлай туруп, коронавирус аврувгъа къаршы вакцина этмекни таклиф эте. Олай да, ол оьзю биринчилерден болуп, халкъгъа уьлгю гёрсете туруп, йылны башында вакцинаны эки де компонентин этген.

Къарабудагъгент районда вакцина этивню барышы гьакъда билмек ва вакцина этеген адамланы гёрмек муратда район газетни къуллукъчулары Къарабудагъгент ЦРБ-ге бардыкъ.

Онда укол этеген хас кабинетге ёлукъдукъ. Шо кабинетни алдында вакцина этмеге гезикге тургъан 5-6 адам бар эди. Олагъа вакцина этивню гьакъында сорав бергенде, олар гёнгюллю кюйде этегенин айтды. Демек, коронавирус аврув булан аврумасын учун вакцинаны этмеге токъташгъан.

Сонг биз вакцинаны этгинчеге медицина документ толтурагъан хас кабинетде олтургъан участковый терапевт Найида Мутдагьирова булан бир гесек лакъыр этдик ва ондан вакцина этивню юрюшю гьакъда баянлыкълар алдыкъ.

Н.Мутдагьированы сёзлерине гёре, район больницада вакцина тарыкъ чакъы бар. Ону этдирмек учун районлулар гелип тура. Шоллукъда, гьар гюн КЦРБ-ге вакцина этмек учун адамлар геле. Масала, бир-бир гюнлер 30-40 адам вакцина этдире буса, бир-бир гюнлерде – 50-60 адам геле.

Участковый терапевтни маълуматларына гёре, артдагъы гюнлерде вакцинаны этмеге иши ёкъ, ишлемейген адамлар да гелмеге башлагъан. Олай да, гьар гюн районну ичиндеги юртларда да 20-25 адамгъа вакцина этиле. Масала, янгыз Къурбуки юртда бир жуманы ичинде вакцинаны 80 оьлчевю адамлагъа этилген.

Къарабудагъгент ЦРБ-ни укол этеген хас кабинетини жаваплы къуллукъчусуну баянлыкъларына гёре, прививка этеген кабинет ял алагъан ва байрам гюнлерде де ишлей, вакцина этмеге сюегенлени къабул эте. Олай да, районну ичиндеги юртларда вакцина этив чаралар оьт­герилип тура. Масала, 15-20 адамдан вакцина этмеге тилев къабул этиле, олагъа шо амбулаториягъа яда ФАП-гъа вакцинаны оьлчевлери етишдириле. Ерли медсестралар юртлулагъа вакцинаны эте.

Найида Мутдагьирова медицина документлерин толтургъан сонг, вакцинаны этдиреген адамланы иссилигин ва давлениесин тергей. Сонг да, башгъа тюрлю авур аврувлары бар экенлиги гьакъда айтмагъа ва билдирмеге таклиф бере.

Гертилей де, авур коронавирус аврувну токътатмакъ ва яйылывуну алдын алмакъ учун адамлар вакцина этсе яхшы болур деп, бизин алимлерибиз ва врачларыбыз айтып тура. Биз де шоланы шо таклифлерине тынгласакъ, яхшы болур. Интернет торунда ва социал байлавлукъларда айтылагъан ва гёрсетилеген маълуматлагъа ва видеороликлеге къулакъасмагъа тюшмей. Шолар халкъны башын алдатмакъ учун юрюлеген кюрчюсю ёкъ ва далиллерсиз биревлени ойлары ва сёзлери.

Гьюрметли районлулар, оьзюбюзню савлугъубузну ва къаркъарабызны ихтияры оьзюбюзде экенибизни унутмайыкъ! Шо савлугъубузну сакъламакъ ва энниден сонг да савлукъ булан яшамакъ учун мекенли ва адилли врачлагъа тынглайыкъ, оланы таклифлерин къабул этейик!