Бюджетни масъаласы

Оьтгерилген сессияны район Жыйыныны председатели Адил Салаватов ачды ва юрютдю. Инг башлап ол депутатланы гезикли сессияны гюнлюк низамы булан ювукъдан таныш этди.

Демек, сессияны барышында ««Къарабудагъгент район» муниципал районну 2021-нчи ва планлашдырылгъан 2022-2023-нчю йылланы бюджетине» деген район Жыйыныны къарарына алмашынывлар этив гьакъда район администрацияны финанс ишлеге къарайгъан управлениесини ёлбашчысы Абубакар Шагьманаев маълуматлар берди.

Олай да, А.Шагьманаев ««Къарабудагъгент район» муниципал районну 2022-нчи ва планлашдырылгъан 2023-2024-нчю йылланы бюджетине» деген район Жыйыныны къарарыны проектини гьакъында да аслу маълуматлар берди.

Ол эсгерген кюйде, муниципал районну бюджетини гелим гесеги 24 миллион 300 минг манатгъа артгъан. Шо да – республикадан гелеген субвенция акъчалар. Олай да, маданият тармакъны якъламакъ муратда китапханаланы янгыртмакъ учун 400 минг манат акъча да гёрсетилген.

А.Шагьманаевни сёзлерине гёре, Губден юртдагъы маданият къаланы къурмакъ учун 6 миллион манатдан къолай дагъы да харж гёрсетилген.

Район администрацияны финанс управлениесини ёлбашчысы А.Шагьманаев районну 2022-нчи йылгъа къабул этилеген бюджетини проектини гьакъында да маълуматлар берди. Масала, район бюджетни умуми гелими 1 миллиард 548 миллион 131 минг, чыгъышлары буса 1 миллиард 546 миллион 451 минг манат болажакъ. Олай да, шо акъчаны 1 миллиард 308 миллион манаты республика бюджетден гелеген акъча.

Оьтгерилген сессияны барышында район администрацияны юрт хозяйство управлениесини баш касбучусу Гьажи Бийгишиев «Къарабудагъгент район» муниципал районну дазуларындагъы муниципал топуракъланы тергев болдурувну положениеси гьакъда депутатлагъа баянлыкълар берди. Сессияны барышында район Жыйыныны депутатлары бюджетни ва юртларда этилмеге герекли ишлени гьакъында оьзлени соравларын ва таклифлерин бердилер. Район администрацияны башчысыны орунбасарлары Ибрагьим Абдулмежитов ва Жалалутдин Жамалутдинов, гётерилген масъалалагъа гёре жавап бере туруп, бу йыл ремонт этмеге гёз алгъа тутулгъан социал идараланы масъалаларын уьстюнлю чечмеге чалышажагъын аян этдилер.

Оьтгерилген сессияны барышында «Къарабудагъгент район» муниципал районну Жыйыныны депутатлары гётерилген гюнлюк масъалалагъа гёре оьзлени тийишли къарарларын къабул этди.

Сессияны ачгъан ва юрютген район Жыйыныны председатели Адил Салаватов депутатлагъа ва район администрацияны жаваплы къуллукъчуларына баракалла билдирди.