В.Путин журналистлени соравларына жаваплар берди

В.Путинни журналистлер булангъы прес-конференциясын мердешли кюйде президентни прес-къуллугъуну ёлбашчысы Дмитрий Песков юрютдю.

Прес-конференция токъташдырылгъан заманда башланды. Владимир Путин залдагъылар булан саламлашып битген сонг:

- Сёйлевлени узакъ этмей, сизин талчыкъдырагъан, сиз гётереген масъалалагъа сиз рази къалагъан кюйде жаваплар алма болажакъсыз. Гелигиз башлайыкъ, — деди.

Дмитрий Песков уьлкени башчысына сорав берме Россия журналистика корпусну патриархы, «Интерфакс» агентствону ёлбашчыларыны бири В.Тереховгъа ихтияр берди. Ол экономика, социал, коронавирус инфекция аврувну алдын алыв, пандемия гележекде уьлкени оьсювюне, ватандашланы яшав даражасына бу къыйын заманларда Центробанкны иши гьакъда сорав берген.

В.Путин огъар булай жаваплар берген:

-Эгердим, сиз береген соравлагъа толу жавап берме бажарылса, шуну булан биз прес-конференцияны тамамлап къойсакъ да ярай. Сиз гётереген масъалаланы даражасы шонча да уллу чу, дагъы журналистге сорав да къоймадынг, –деди.

- Сиз берген соравгъа гезиги булан жавап берейим.

Айтма тарыкъ, коронавирус инфекция аврув дюньядагъы бары да пачалыкъланы экономикасына йимик, бизин уьлкени экономикасына, ватандашланы яшав гьалына терс яндан таъсир этди. Производство чаналады, халкъланы, айрокъда кёп яшлы агьлюлени яшав даражасы тёбенлешди. Тек заманында гёрюлген чараланы натижасында экономикабыздагъы гьал къолайлашды. Бир-бир тармакъларда, масала, къурулушда, промышленностда алгъа барыв бар.

Юрт хозяйствода ашлыкъ болдурув 2020-нчы йылдан бираз аз буса да, бу йыл 123 миллион тон аш­лыкъ болдургъанбыз, шо яхшы гьасил, — деди В.Путин.

В.Путин журналистни соравуна жавап бере туруп:

- Бу йыл къурулуш тармакъда къолда этген натижаланы малим этди. Бу йыл 90 миллион квадрат метр пайдаландырывгъа берилген. Шо Россияны янгы тарихинде лап гёрмекли гьасил, къурувчуланы бу уьстюнлюгю булан къутлайман. Уьлкеде орта гьисапда алапаланы артыву гьис этиле. Инфляция да гётеринки – 8 процент. Шо биз гёз алгъа тутгъанындан кёп. Уьлкеде ишсизликни де алдын алывда алгъа барыв бар, тек пандемиядан алдагъы санавгъа етишмегенбиз.

В.Путин прес-конференцияда журналистлер гётереген соравлагъа жавап бере туруп, тарихге гетип барагъан йылда уьлкени Гьукуматыны, Центробанкны ишине разилигин яшырмады.

Уьлкени гьакимбашына коронавирус инфекция аврувну алдын алывда вакцина этдирив иш тийишли натижа бермей, шо саялы вакцина этдирмейгенлеге къатты чаралар гёрме, къоду салма тарыкъ деген соравланы да берди.

- Гертилей де, бир-бир оьз­ге пачалыкъларда йимик бизин уьлкеде де адамланы арасында коллектив иммунитет болсун учун вакцина этдиривню темплери 59,4 процент. Уьлкени 70 миллион адамы биринчи прививканы этген,- деп жавап берди В.Путин.

Прес-конференцияда тыш пачалыкъланы маълумат къуралларыны журналистлери тыш политикасына, айрокъда хоншу Украина, оьзге Европа пачалыкълар булангъы аралыкълагъа, Европа пачалыкълагъа газ барагъан «Северный поток – 2» газ быргъыны гележек къысматына ва оьзге тюрлю халкъара масъалалагъа байлавлу кёп тюрлю соравлар берди.

Китай пачалыкъны «СиньХуа» маълумат къуралыны журналисти гьалиги девюрде Россия ва Китай пачалыкъланы дав-экономика аралыкъларына байлавлу соравну берди.

О гьакъда В.Путин булай деди:

- Китайны да, Россияны да арасында дослукъ, бир-бирин англайгъанлыкъ гюн сайын беклеше ва гюч ала. Эки де уьлкени арасында сатыв-алыв, оборона аралыкъланы беклешдирив, сынав алышдырыв ва оьзге чаралар токътавсуз генглеше. Бу йыл эки де пачалыкъны арасында мал айландырыв 100 миллиард долларгъа етишген. Шо яхшы натижа.

В.Путин тыш пача­лыкъ маълумат къуралланы журналистлери береген соравлагъа гесип-гесип, теренден анализ этип, жаваплар къайтарды.

В.Путинни журналистлер булан болгъан прес-конференциясы къысгъартылып бериле.