Меню
16+

Сетевое издание "Району яшаву"  «Будни района»

10.12.2021 10:32 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Къайсы къуллукъда да бажарывлугъун гёрсетген…

Автор: Шихав Къайирбеков

Газетибизни гетген номеринден тутуп «Районну белгили адамлары» деген рубриканы тюбюнде, оьзлени къайратлы загьматы, иш бажарывлулугъу, усталылыгъы, къурумчу пагьмусу булан районубузну социал-экономика оьсювюне, ватандашланы яшавлукъ даражасын къолайлашдырывда, савлукъ сакълав, яшлагъа билим-тарбия беривде аслам къошумун этген районну ёлбашчыларыны, загьматда оьр натижалагъа етишген ёлдашланы, оьзге касбучуланы вакиллерини оьрлюклерин газетибизни охувчуларына къайтарып эсине салмакъ деген къастны салабыз.

Къарабудагъгент юрт районну центрындан къайры да, районну экономика оьсювюне, социал-яшавлукъ масъалаланы чечивде, алгъа салынгъан масъалаланы яшавгъа чыгъарывда айрыча къошумун болдуруп гелген.

Алгъа салынгъан масъалаланы яшавгъа чыгъарывда, загьматчы халкъны яшав даражасын яхшылашдырывда ёлбашчыны касбу бажарывлулугъундан, жавапчылыгъындан, ишге берилгенлигинден кёп зат гьасил бола.

Бугюн биз районубузну гьалиги даражасына етишдиривде гьар тюрлю къуллукъларда намуслу кюйде ишлеп, бажарыв кюйде ёлбашчылыкъ этип гелген ёлдашны загьмат ёлун, ол башчылыкъ этген хозяйстволаны загьмат оьрлюклери булан оьсюп гелеген яш наслуну таныш этме сюебиз.

Шолай адамланы бириси къарабудагъгентли, юртубузну, районубузну гьюрметли адамларыны бири Гьажи Гьажакъаевич Гьажиев.

Гь.Гьажиев давну алдындагъы йылланы замандашы. Ол 1935-нчи йылда Къарабудагъгент юртда сабанчыны агьлюсюнде тувгъан. Ону яшлыгъы тенглилериники йимик ач, къыйын йыллагъа рас гелген. Къурсагъы тойгъунча ашама аш, гийме опуракъ ёкъ заманлар буса да Гьажи Гьажиев оьзюню гючюне, чагъына гёре агьлюге кёмек этме, къол ялгъама гьаракат эте болгъан. Къол арба булан «Къашгъа-тавну» бетлеринден къапси ташыгъан, ожакъдагъы гьайван-малгъа къуллукъ этивде гючю етишеген ишлени кютген.

1944-1954-нчю йыллар школада охугъан. Школаны битдирген сонг Армияда къуллукъ этген.

Армиядан къайтгъан сонг оьр билимлеге ес болмакъ учун Гьажи Гьажиев республикабызны тахшагьары Магьачкъалада Дагъыстан юрт хозяйство институтугъа охума тюше ва 1962-нчи йыл ону уьстюнлю кюйде тамамлай.

Оьр охув ожакъны битдирген сонг жагьил касбучуну Къарабудагъгент сугъарыв управлениеге агроном этип бакъдыра. Бу къуллукъда Гьажи Гьажакъаевич оьзюню бажарывлу касбучу гьисапда гёрсете, борчларына жаваплы янашып загьмат тёге. Районну сугъарыв управлениесинде агроном къуллукъда кёп да ишлемей ону юртдагъы Карл Марксны атындагъы колхозгъа агроном этип гёчюре. Бу къуллукъда ол топуракъланы асувлу ишлетивде, чачылагъан чачывланы тюшюмлюлюгюн артдырыв­да бары бажарывлулугъун салып чалыша. Топуракъланы моллугъун гётеривде ерли шартланы, демек ерли кюйлевючлени авлакълагъа тёкмекни гьайын этген.

1965-нчи йыл КПСС-ни район комитети Гьажи Гьажакъаевични районну юрт хозяйство управлениесине баш агрономну къуллугъуна гёчюрелер.

Янгы къуллукъда Гьажи Гьажиев районда чачыв майданланы генг­лешдиривде, юрт хозяйство продукталар болдурувну, артдырывну уьстюнде чалыша. Шо йылларда районну хозяйстволарында ишни прогрессив къайдаларын къоллавгъа, оьр сортлу урлукълар чачывгъа, илмуну янгылыкъларын юрт хозяйст­вода къоллай туруп районну хозяйстволары ашлыкълар, емишлер, овошлар оьзге тюрлю юрт хозяйство продукталар болдурувда ва оланы пачалыкъгъа сатып беривде гёрмекли уьстюнлюклеге етише гелген. Бу гьаракатда Гьажи Гьажиевни къошуму да аз болмагъан.

1966-нчы йылда Къарабудагъгент юртдагъы Карл Марксны атындагъы колхозну орнуна «Танг» деген юзюмчюлюк совхоз къурула. Янгы совхоз къурулгъан сонг районну ёлбашчылары бизин макъалабызны игитин хозяйствогъа баш агрономну къуллугъуна бакъдыралар.

«Танг» совхозда баш агрономну къуллугъунда Гьажи Гьажиев уьч йыл ишлеген. Шо йыллар районда юзюмчюлюк тармакъны оьсдюрювде уллу жанланыв гьис этиле эди. Районну бары да хозяйстволарында янгы юзюм бавлар орнатыла эди. «Танг» совхозда 1200 гектаргъа борла орнатылгъан. Бу гьаракатда хозяйствону баш агрономуну гьаракатын айрыча эсгерсе де ярай. Ол шо йылларда ата юртунда топуракъларында юзюм бавланы майданларын генглешдиривде, таман даражада орнатыв материал тапмакъ, борла орнатывда загьмат тёгегенлени тарыкълы техника булан таъмин этмек учун хыйлы чабып айланма тюшген.

Советлени девюрюнде ишлени ёрукълу юрютюмек учун партия ­кадрланы бир ерден оьзге ерге гёчюреген заманлар.

1970-нчу йылда Гьажи Гьажакъаевични «Манасгент» совхозгъа директор этип йиберелер. Шонда ол 3 йыл хозяйствону ёлбашчысы болуп ишлеген йыллар хозяйство оьсювню ёлунда юзюм, ашлыкъ оьзге тюрлю юрт хозяйст­во продукталар болдурувда ва ону пачалыкъгъа сатып беривде гёрмекли натижалагъа етишгени саялы хозяйствону аты республика, район жыйынларда макътала юрюгени манасгентли уллу наслуланы яхшы эсинде.

1975-нчи йылда Гьажи Гьажиевни къайтарып «Танг» совхозгъа директор этип салалар. Бу къуллукъда ол 8 йыл ишлеген. Шо йыллар «Танг» совхозну тарихинде уллу уьстюнлюклери булан янгыз Дагъыстанда тюгюл савлай Темир-къазыкъ кавказда инг де уллу юзюмчюлюк хозяйство гьисапда эсгериле эди. Хозяйствону юзюмчюлерини, механизаторларыны, орта звеноланы ёлбашчыларыны, оьзге касбучуланы къайратлы загьматы булан юзюм бавланы майданлары, участкаланы тюшюмлюлюгю йыл сайын артып юрюй эди.

Шо йылларда совхозда юзюмлюк­лени майданлары 1700 гектаргъа етише эди.

Юзюмлюклени майданларын генг­лешдире туруп, оьзге тармакъларда тергевсюз къалмагъан. «Къазанчы къайнамаса, къазан къайнамас» дегенлей совхозну директору чабып айланыву, гьаракаты булан хозяйст­вону «Къадакъай» участкасында типовой къайдада гьайванчылыкъ комплекс, юзюм гесив сезонда хозяйствогъа кёмекге гелген студентлер яшавлукъ этсин учун хозяйствону уьч участкасында общежитиелер къурула. Чинкдеси, шо йылларда совхозда 25 минг тон юзюм къабул этме болагъан завод къурулду. Хозяйствону гьар тюрлю тармакъларында 1500-ден къолай адам ­ загь­мат тёге. Ишчилеге ишлеме, ял алма онгайлы шартлар болдурмакъ учун хозяйствону харжы булан 3 яшлар баву къурулгъан ва оьзге имканлыкълар болдурулгъан.

Янгыз «Танг» совхозда Гьажи Гьажиев директор болуп ишлейген йылларда 17500 тон юзюм, 2700-3000 тон ашлыкъ, 1800-2000 тон сют ва оьзге тюрлю авлакъ ниъматлар, емишлер болдурула эди.

Хозяйствону 100-ден де къолай автомашини, 120-дан къолай тракторлары, оьзге тюрлю юрт хозяйство техникасы бар эди.

Совхозну материал техника базасы артгъан сайын, ишчилени механизаторланы къазанчы да яхшы гётерилип, юзюмчюлени гёнгю хош йыллар кёп болду. Юзюм, оьзге юрт хозяй­ство продукталар болдурувда ва ону пачалыкъгъа сатып беривде етишген уьстюнлюклери саялы ишчилер, механизаторлар йыллыкъ къазанчына гёре яхшы премиялар алып, кёплени яшав даражасы алгъа гетди.

«Танг» совхозну директоруну къуллугъундан тайгъан сонг да Гьажи Гьажиев районда гьар тюрлю жаваплы къуллукъларда ишлеп гелген.

Янгыртып къурувну лап авур йылларында, 1990-1995-нчи йылларда, Гьажи Гьажакъаевич район администрацияны башчысы болуп ишлеген.

Къайда ишлесе де, не къуллукъну кютсе де, Гь.Гьажиев ишге жаваплы янашып, халкъны гьайын этип ­загьмат тёкген.

Пенсиягъа чыкъгъан сонг да Гьажи Гьажакъаевич районну яшавунда актив кюйде ортакъчылыкъ этип юрюдю. Ол яшланы патриот ругьда тарбиялавда да охувчулар, яш наслу булан кёп ёлугъа эди.

Ишде етишген уьстюнлюклери саялы Гь.Гьажиев «Гьюрметлев белги» орден, «Къайратлы загьматы учун» деген медал, ВДНХ-ны алтын медали ва оьзге тюрлю савгъатлар булан савгъатлангъан. 

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3