Яшёрюмлени масъалалары
Алдагъы гюнлерде, Къарабудагъгент районну делегациясы районну башчысыны ягъындагъы районну Къатынгишилерини Союзуну ёлбашчысы Гюлжанат Темирова ва районну къатынгишилерини Советини ягъындагъы яшёрюмлени парламентини ёлбашчысы Мадина Исрапилова булан Магьачкъала шагьарда «Мы – за мир без зла и насилия, за счастливое будущее детей!» деген темагъа гёре оьтгерилген дёгерек столда ортакъчылыгъын болдургъан.
Шо ёлугъув ДР-ни милли сиясатыны ва ругьани ишлеге къарайгъан министерлигини, ДР-ни яшны ихтиярларын якълайгъан толу вакилини, «Союз женщин Дагестана» ДРОО-ну сиптечилиги булан оьтгерилген.
Ёлугъувну аслу мурады – бизин гележек наслубузну, яшларыбызны школаларда ва орамларда гьар тюрлю яман ва зараллы агьвалатлардан къоруп сакъламакъ, Магьачкъала 51 номерли орта школада болгъан йимик яман ишлени, къувунлу гьалланы алдын алмакъ эди.
Ёлугъувну барышында яшёрюмлени низам бузувуна къаршы ишлер, агьлюде ата-ананы, школада муаллимни авторитетин гётеривге, яшёрюмлерибиз охувчулар учун кимлени авторитети уллу роль ойнайгъанны билмек, шогъар гёре не иш юрютмеге гереги гьакъдагъы, яшланы тюз тарбиялавгъа, оланы загьматгъа, билим алывгъа къуршамагъа гереклиги, яшланы тарбиялавда ата-аналаны ва школаны бирче ва къыйышывлу ишине багъышлангъан масъалалагъа къаралды.
Шо масъалалагъа, оланы ёрукълашдырвгъа гёре каникуллардан сонг, Къарабудагъгент районну бары да школаларында социал къурумланы вакиллерини ортакъчылгъы булан муратгъа къыйышывлу тюрлю чаралар оьтгерилежек.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
