Министр сапарда

Шоллукъда, 31-нчи октябрде, ­оьтген къаттыгюн, республикабызны савлукъ сакълав министрини заманлыкъгъа борчларын кютеген Татьяна Беляева Къарабудагъгент район больницагъа сапар булан гелген. Шо сапарында ол билдирилген ял алагъан гюнлени ичинде медицина идараланы ва вакцина этдиреген пункт­ланы ишине тергевюн болдургъан.

Министрни заманлыкъгъа борч­ларын кютеген Т.Беляева шо гюн вакцина этдиреген пунктгъа, шо вакцинаны сакълайгъан холодильниклеге, адамлагъа этдирилеген вакцинаны бар экенлигине айрыча тергев этген. Насипге, къаттыгюнге де къарамайлы, вакцина этдирилеген хас кабинет адамланы къабул эте эди.

«Узакъ ял алагъан гюнлени вакътисинде бизин ватандашларыбыз алгъасавлу медицина кёмекни алмагъа ихтияры бар. Шо саялы да, больницаланы ва поликлиникаланы шо гюнлерде ишине айрыча къатты тергев болдурулажакъ», — деген Т.Беляева оьзюню сёйлевюнде.

Сапарны барышында Татьяна Беляева янгыртылгъан ва ремонт этил­ген яшланы къабул этеген поликлиниканы ичинден де айлангъан ва огъар оьзюню тергевюн болдургъан. Ремонт этив ишлер «Савлукъ сакълав» деген милли проектге гёре этилген. Олай да, пачалыкъны хас программасына гёре, Къарабудагъгент район больницаны хирургия бёлюгюне ва уллуланы къабул этеген поликлиникагъа шолай мукъаятлы ремонт ишлер этилген.

Къарабудагъгент район больницада ял алагъан гюнлерде ишлемеге тарыкълы касбучуланы хас графиги тизилгенин ва шогъар гёре адамлагъа медицина кёмек болдурулагъанын больницаны вакили аян этди.