Абурун гётерейик!

Оьзюне 70 йыл тамамлангъан «Районну яшаву» газетни гележеги артдагъы йылларда асасы ёкъ адам йимик акъсай. Шогьар себеп – огьар язылыв осаллыкъ экенликдир. Журна¬лист касбу тынчлардан саналмайи, оланы язывлары охувчу рази къалардай болмаса бажарылмай. Биревлер: «Журналистлер кимлердир, язды – ялгьанны болду», — деп къоялар. Шо тайпалар янгылыш бола. Мен оьзюм 1960-нчы йылда газетде ишлеп, ону талигьи бу¬лан таныш болгъанман. Шо йылларда газетде Магьаммат Салигьов, Абдулвагьап Межитов, Къурманали Шамсутдинов, Абдулмуслим Мустапаев ва мен бар эдик. Бир эсги уьйде ерлешген редакцияда яшав шартлар да, онгайлыкъ да ёкъ эди, материалланы гьарплары къол булан жыйып гьазирленип турду.

Советлер Союзун «бекбилдилер» тозгъан девюрден бугюнге ерли газетни гележеги шатлыкъда оьсмей, охувчулары аз да бола бара.

Тек ону аз болагъаныны себеби газетни кемчиликлери саялы тюгюл, газетибиз гюн сайын яхшылаша ва тюрлене. Адамланы башгъа ойлары кёп боламы яда янгы технологияны къоллав, жагьиллер газет охума сюймейгенлик, не де башгъа себеплерденми, тек язылыв осаллаша барагъаны ачыкъ.

Къарабудагъгент район тав уьлкесинде къайсы ягъындан алгъанда да алда гелип, гёрмекли ерлеге ес болуп гелген районланы бири эди. Мунда 7 къумукъ юрт бар. Тек не этерсен? Халкъ язылывгъа немкъорай къарай.

Къакъашура юртда алда 800-950-ден артыкъ адам газетге язылыв юрюте эди. Шозамангьы почда ишлеген Анаш Умалатова, Илмият Абдурашитова экишер къап толгъан газетни охувчулагъа етишдире эдилер. Бугюнлерде район газетге язылывну санаву 250-ге сама етишмей. Бир тайпа¬лар язылыв гьакъда хабарласакъ: «Охума заман ёкъ, экинчиси де — онда бары ялгъан», — деп къоялар. Булайланы пикрусу тюз тюгюл, шо тайпалар мадарлыгъы бар газетде Камилсолтан Вагьаповну «Къакъашура — етим къалгъан юрт» деген макъаласы чыкъгъанда, уьч ювугъум гелип: «Шо газетни бер хари», — деп тиледилер. Инаныгъыз, бермедим.

Мен оьрде эсгерген кюйде, юртларда язылыв тийишли кюйде оьтгерилсе, район газетни тиражи 3500-4000-ге етишежек эди. Буссагьатгъы тиражы 2580 деп языла.

Бизин район газетде кёп пагьмулулар арагъа да чыкъды, олар: Сагьадулла Юсупов, Исмайыл Исмайылов, Абдуллабек Абдуллабеков, Бадрутдин Магьамматов, Узлипат Ибрагьимова.

Алда ёкъ «Яшланы бокъчасы» арагъа чыкъды, хаталар тюзленди. Редакци¬яда загьмат тёгеген Абдуллабек Самадов, Багьавутдин Самадов, Нюрсагьадат Изамутдинова ва оьзгелери белсенип загьмат тёгегени кимни де сукъландырмай тюгюл. Олагъа Аллагь савлукъ берсин!

Муна 2021-нчи йыл бите тура, 2022-нчи йылгъа газетибизге язылыв тамамланмагъа аз заман къалгъан. Гьюрметли районлуларыбыз, гелигиз, язылывну оьр даражада оьтгерме этек чалайыкъ! «Районну яшаву» газетибизни абурун ер этмейик!

Стахан Мутаев, Къакъашура юрт, загьматны ветераны