Масъалалагъа къаралды
Районну башчысы Магьмут Амиралиевни ёлбашчылыгъы булан ноябр айны 3-нде оьтгерилген генгешде чёп-алагъожаны чыгъарыв, адамланы гьисабын юрютюв, вакцина этдирив, Роспотребнадзорну талапларын тюзевлю кюйде кютюв масъалалар арагъа салынып ойлашылды.
«Районда чёп-алагъожаны жыйывгъа ва чыгъарывгъа гьакъ жыйыв бу йыл да 20 процентден гётерилмей. Шо саялы олагъа ягъарлыкъ материалгъа бермеге герекли борч жыйылгъан. Гьар адам, гьар юртну башчысы оьзлени юрту таза болгъанны сюе. Шолай болгъан сонг, шо ишге гёре гьагъын да тёлеме герек!»-дей Магьмут Амиралиев ва юртланы башчыларына юртлулар булан англатыв ишлер юрютмеге тапшура.
Генгешде адамланы гьисабын чыгъарыв масъаланы гьакъында айта туруп, узакъ къалмай гьасиллер чыгъарылмагъа башланажагъын айтылды.
Гьалиге бир-эки юртлардагъы гьал къоркъунчлу кюйде. Бир-бир юртларда адамланы гьисапгъа алыв гёз алгъа тутулгъан замангъа толу кюйде битмей къалма бола.
Магьмут Амиралиев айтагъан кюйде, юртлардагъы адамланы санаву юртлагъа, олай да районгъа гелеген бюджетни оьлчевюне таъсир эте. Бир-бир адамлар оьзлени гьисапгъа алывгъа къаршы чыгъа, бирлери Къарабудагъгент районну гёрсетмей къоялар.
Шолай гезиклер кёбюсю гьалда Агъачавул ва Янгы Паравул юртларда ёлугъа.
Гезикли масъалаланы гьакъында айта туруп, Роспотребнадзорну талаплары халкъны къуллукъларын кютеген идараларда толу кюйде кютюлмеге герегин эсгерилди.
«Оларда арты уьзюлмеген кюйде дезинфекция этеген алатлар, маскалар болма, адамланы арасында тарыкъ чакъы мезгил сакъланмагъа, олай да ОR код болма тарыкъ. Шогъар гёре районда рейд ишлер юрюле. Роспотребнадзорну ва ОМВД-ни вакиллеринден къурулгъан 4 иш группа бар»,-дей М.Амиралиев.
Ахырынчы, тек инг де аслу масъала деп гьисапланагъан вакцина этдиривню гьакъында айта туруп, районну башчысы артдагъы жуманы ичинде 500-ден де къолай адам вакцина этдиргенни, бирче алгъанда районну ичинде 8000-ден де аз адам вакцина этдиргени, шо Дагъыстанда инг де аз этдирген районланы бириси деп гьисапланагъанны эсгерди.
«Авруйгъанлар кёп болмаса, демек, дарманлар ва таза гьава береген аппаратлар етишмейген болмаса, къырыйындагъы ювукъ адамлары аврумаса, оьлмесе, вакцина этдирмеге ярамаймы?! Геч болгъанда этдирмеге айланмай, заманында этдирсе, яхшы тюгюлмю? Барыгъызны да гьар-бир ерде вакцина этдирмекни пайдасы гьакъда англатывлар бермеге, вакцина этдирив ишни активлешдирмеге чакъыраман»,-деп сёзюн тамамлады районну башчысы
Район администрацияны
пресс-къуллугъу
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
