Эсделикге гюллер салдылар

Шоллукъда, ноябр айны 10-нда Къарабудагъгент районну башчысы Магьмут Амиралиев оьзюню орунбасары Магьамматгьанипа Зугьумовну узатыву булан РФ-ни МВД-сини Къарабудагъгент райондагъы бёлюгюне бардылар. Шо ёлугъувда олар эсгерилген ич ишлер бёлюгюню къуллукъчуларын оьзлени хас касбу байрамы булан къутладылар.

«Гьюрметли полицияны ва ич ишлер къурумланы къуллукъчулары! Бугюн сизин касбу байрамыгъыз булан гьакъ юрекден къутлай туруп, сизге оьзюгюзге къатты савлукъ, ожакъларыгъызгъа насип ва берекет, ишигизде буса ачыкъ ва ярыкъ гюнлер ва уьстюнлюклер ёрайман.

Полицияны къуллукъчулары къайсы девюрде де жамиятны арасында низамлыкъны ва парахатлыкъны болдура гелген. Сиз шо ишни гьар гюн юрютесиз. Муна бугюнлерде де арабызда яйылып турагъан коронавирус инфекция аврувну алдын алывунда да сизин ишигиз агьамиятлы ва гёрмекли.

Айтагъаным, пачалыкъны гьукмулары ва къарарларына гёре, орамларда, ёл юрюшде ва оьзге тарыкълы чараларда оьзюгюзню къошумугъузну болдурасыз. Шо ишигизни тийишли кюйде кютегенигизге сизге бирдагъы керен баракалламны билдиремен», — деди Магьмут Амиралиев оьзюню сёйлевюнде.

Къарабудагъгент РОВД-ни ёлбашчысы Герей Гереев оьзюню сёйлевюнде иш ёлдашларын касбу байрамы булан къутлагъан сонг, олагъа савлукъ, насип, парахатлыкъ ва ишинде уьстюнлюклер ёрады. Сонг ол районну гьакимбашы Магьмут Амиралиевге ич ишлер къурумланы къуллукъчуларына районну администрациясындан этилеген ва кютюлеген иши саялы оланы атындан разилигин билдирди.

Чараны барышында РОВД-ни ветеранларыны советини ёлбашчысы Нюрмагьаммат Мурзаев сёйледи ва ветеранланы атындан бугюн-буссагьат оьз борчун кютеген иш ёлдашларына ва районну ёлбашчыларына баракалласын билдирди.

Оьтгерилген чарада районну гьакимбашы Магьмут Амиралиев Къарабудагъгент РОВД-ни бир нече къуллукъчусуна районну администрациясыны атындан Гьюрметлев грамоталар тапшурду.

Оьтгерилген чара оьз борчун кютювде жанын къурбан этген ич ишлер къурумланы къуллукъчуларына салынгъан эсделикге жанлы гюллер салып тамамланды.