90 процент къуршалгъан

Генгешни аввалында районну гьакимбашы М.Амиралиев генгешни ортакъчыларын гюнлюк низам булан ювукъдан таныш этди. Демек, генгешни барышында адамланы Бютюн­россия гьисабын алыв ва вакцина этдиривню гьакъында айтылды.

Адамланы Бютюнроссия гьисабын алыв чараны (ВПН-2020) гьакъында Дагъыстанстатны Къарабудагъгент район филиалыны ёлбашчысы Нажмулгьуда Гьасанов маълуматлар берди.

Ону сёзлерине гёре, адамланы гьисап алыв иш тамамлана тура, переписчиклер ва контролёрлар кёп къадарда иш этген, гьисап алывну гьасиллерин чыгъармагъа ювукъ бола тура.

«8-нчи ноябрге савлай районну ичинде 16 минг 593 яшавлукъ уьй ва 89 минг 446 адам гьисапгъа алынгъан. Шо буса умуми алгъанда 92,6 процент яшавлукъ уьйлер ва адамлар гьисап алыв чарагъа къуршалгъанын гертилей. Бизин жаваплы къуллукъчуларыбыз 14-нчю ноябрде оьзлени бойнуна салынгъан борчланы тийишли кюйде тамамламагъа тарыкъ.

Оьтгерилген гьисап алыв ишни оьр даражада юрютеген юртланы арасында Къарабудагъгентни, Дёргелини ва Уллубийавулну эсгермеге ярай. Шо юртларда гьисап алыв чараны 97 проценти битген. Олар булан янаша Агъачавул, Паравул, Манас, Аччысув ва Аданакъ юртларда шо ишни гючлендирмеге тарыкъ», — деди Н.Гьасанов оьзюню сёйлевюнде.

Районну ичинде вакцина этдиривню барышыны гьакъында Къарабудагъгент район больницаны баш врачы Расул Гьиравов баянлыкълар берип сёйледи. Ону сёзлерине гёре, ишлемейген деп билдирилген гюнлени ичинде вакцина этдирегенлени санаву артгъан эди. Демек, гьар гюнню ичинде 40-50 адам вакцина этдирген. Артдагъы гюнлерде буса шо иш янгыдан осал болгъан, 60 йылдан оьмюрчагъы уллулар сийрек барагъан болгъан.

Генгешде гётерилген масъалалагъа гёре, районну гьакимбашы М.Амиралиев оьзюню ойларын ва пикруларын айтды.

Демек, Бютюнроссия гьисап алыв чараны гьасиллерине гёре гележек 10 йылны ичинде районда школалар, яшлар бавлары, больницалар ва ёлланы, орамалы, ял алагъан бавланы онгарыв ва ремонт ишлер этилмеге гёз алгъа тутулагъанын ачыкълашдырды.

«Юртланы башчыларын, гьисап алыв ишни юрютеген къуллукъчуланы оьзлени шо ишине жаваплы янашмагъа ва кютмеге чакъыраман. Олай да, адамланы гьисабына гёре савлай районну ва айрыча гьар юртну бюджети къурулагъанын да унутмагъа ярамай», — деди М.Амиралиев.

Сонг районну гьакимбашы коронавирус инфекциягъа къаршы этдирилеген вакцинаны гючлендирмеге районну администрациясыны жаваплы къуллукъчуларына ва юртланы башчыларына бирдагъы керен тапшурду.