Янгы чакъырывну сессиясы болду

Сессияда Дагъыстанны Башчысыны заманлыкъгъа борчларын кютеген Сергей Меликов ортакъчылыкъ этди. Ол оьзюню къысгъаракъ сёйлевюнде 2021-нчи йылда сентябр айны 17-19-нда ДР-ни Халкъ Жыйынына депутатлар сайламакъ учун юрюлген сайлавларда дагъыстанлылар оьз­лени актив ватандаш позициясын гёрсетип, сайлавларда ортакъчы­лыкъ этгени, лайыкълылагъа тавушларын бергени саялы разилигин билдирди. Парламентге сайлангъан депутатлагъа буса кёп миллетли Дагъыстанны халкъларыны яшав даражасын, турушувун яхшылышдырывда, республиканы социал-экономика оьсювюне оьз къошумларын этме, оьзлени тувра борчларына жаваплы ва намуслу янашма чакъырды.

Сергей Меликов сессияда сёйлевюн узата туруп, РФ-ни Пачалыкъ Думасына, ДР-ни Халкъ Жыйынына сайлангъан депутатлар сайлавчуланы инамлыкъларын къазанмакъ учун оьзлерден болагъан гьаракатны этежегине, оланы интереслерин якълажагъына инанагъанын билдирди.

Сайлавларда дагъыстанлыланы авадан кёп яны «Бирикген Россия» сиясат партиягъа тавушларын бердилер. Шо буса Россия Федерацияны Президентини курсун якълайгъанны исбат эте.

Сессияда кёп тюрлю масъалалагъа къаралды. Ондан къайры да, сессияда ДР-ни Халкъ Жыйыныны 7-нчи чакъырывуна ёлбашчы сайланды. Сессияны ишинде 90 депутатдан 87-си ортакъчылыгъын болдурдулар. Оланы 82-си «Бирикген Россия» деген сиясат партияны Дагъыстан регион бёлюгю гёрсетген депутат Заур Асевович Аскендеровну кандидатурасын якълап тавуш бергенлер. Натижада ДР-ни Халкъ Жыйыныны 7-нчи чакъырывуну ёлбашчысыны къуллугъуна Завур Аскендеров сайланды. Сессия шо гюн оьзюню ишин тамамлады.