Бажарывлу бутавчу белгиленди
Алдагъы гюнлерде ДР-ни юрт хозяйство ва ашамлыкъ Министерлигини сиптечилиги булан Къарабудагъгент районну Абдулмуслим Айдиев башчылыкъ этеген сабанчы-фермер хозяйствосуну базасында «Бавну инг яхшы бутавчусу» деген конкурс оьтгерилди. Оьтгерилген конкурсну эки де этабындан сонг, районда инг яхшы терек бутавчу белгиленди.
Конкурсну биринчи бёлюгюнде ону ортакъчылары гёрсетилген тереклерде бутав ишлер оьтгерип оьзлени касбу бажарывлулугъун аян этдилер. Экинчи бёлюгюнде – ярышны ортакъчылары жюри берген соравлагъа жаваплар къайтарды.
Ярышны ортакъчыларыны балларын санагъан сонг, районну юрт хозяйство управлениесини ёлбашчысы Шагьабутдин Мустапаев гьасиллени билдирди. Сонг ол Къарабудагъгент районну башчысыны борчларын заманлыкъгъа кютеген Жалалитдин Жамалитдинов булан бирче корнкурсну алдынлысын ва призёрларын багьалы савгъатлар булан савгъатладылар.
Конкурсну гьасиллерине гёре ерлер белгиленди. Ильяс Магьамматов – 1-нчи, Къурбан Алимагьамматов – 2-нчи, Абдулмуслим Гьажиев – 3-нчю ерлеге ес болдулар.
Къарабудагъгент гимназияны директору Адил Салаватовну охувчу уланъяшларда юрт хозяйство тармакъда касбу танглавгъа иштагьын гётеривдеги гьаракатын айрыча эсгермеге тюше. Шо гюн де А.Салаватов коркурсгъа гимназияны оьр класларыны охувчуларын алып гелген эди. Юрт хозяйство касбучулар (специалистлер) еринде яшлагъа гёзел интенсивный бавну, бавдагъы тереклеге бутав этеген къайданы, бутав ишлени кютмек учун нечик алатлар къолланагъан гьакъда англатды ва оланы гёрсетди. Ондан къайры да, къасбучулар яшлагъа юрт хозяйство производствода доланагъан фермерлеге гьукуматны янындан этилеген кёмеклени малим этип сёйледилер.
Жалалитдин Жамалитдинов оьзюню гьасил чыгъарып сёйлевюнде конкурсну алдынлыларын къутлады ва чараны бары да ортакъчыларына районну юрт хозяйство тармагъын гётеривде этеген къошуму саялы разилигин билдирди.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
