«Жаза»
Апрель айны 16-нда Алимпаша Салаватовну атындагъы Дагъыстан пачалыкъ къумукъ музыкалы драм театрны коллективи бизин районда къонакълыкъда болгъан. Театрны коллективи мычыгъыш драматург Абдулла Мусаевни наркотиклеге къаршы язылгъан пьесасын сагьналашдыргъан. Яшланы, яшёрюмлени арасында генг кюйде яйыла гелеген наркотиклени темасына язылгъан асарны къумукъчагъа Байсолтан Осаев таржума этген. Спектакльны Россияны халкъ артисти Айгум Айгумов онгаргъан. Бу пьеса аслу гьалда бизин халкъгъа, жагьиллеге къопгъан “наркомания” деген балагьгъа багъышлана.
Спектакльдеги агьвалатлар бугюнлерде оьр, орта хас, орта школаланы охувчуларыны арасында яйылгъан, наркоманлар болуп барагъан яшланы гележек къысматын суратлай. Наркотиклени таъсирине тюшген яшлар оьзлени савлугъун тас этегенден къайры да, ата-анасындан ва учителлеринден яшырып юрюйлер.
Булай тайпа яш адамлар эсде ёкъдан экстремистлени, жинаятчыланы къолуна, терс ёллагъа тюшюп къалма бола. Спектакльде шолай болма да болуп чыгъа.
«Жаза» деген спектакльге школаланы охувчулары, оланы муаллимлери бек тергевлю къарагъанлар.
Гертиден де, наркомания – агьлю, жамият учун уллу балагь. Оьсюп гелеген яш наслу наркотиклеге тарымакъдан сакъ болма, наркоманлардан арек турма герек.
«Жаза» деген спектакльде бизин белгили артистлерибизни кёплери ойнай. Масала, Россияны ат къазангъан артисти Камил Жабуков, Россияны ат къазангъан артисткасы Тотуханым Осаева, Россияны ат къазангъан артисти Басир Магьамматов, Дагъыстанны ат къазангъан артисти Магьаммат Къасимов, Дагъыстанны ат къазангъан артисткасы Зугьра Маджидова ва оьзгелери ортакъчылыкъ этген.
«Жаза» деген спектакльге къарагъан школаланы охувчулары наркотиклер булан ёнкюме ярамайгъанын гьис этгендир деп эсибизге геле.
Къумукъ театрны Къарабудагъгент районгъа этген сапарыны сиптечилери: театрны ёлбашчысыны орунбасары, ДР-ни маданиятыны ат къазангъан къуллукъчусу Салавутдин Камилович Мусалаев ва театрны баш администратору, ДР-ни маданиятыны ат къазангъан къуллукъчусу Юсуп Абсаматович Гьажиев.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
