Ватаныбызны ва халкъыбызны аманлыгъы...

Бу ерде бир затны эсгермекни арив гёремен, 2014-нчю йылдан бугюнге ерли Украинада Европаны ва США-ны якълайгъан президентлер ёлбашчылыкъ этип тура. Демек, Россияны яннавурунда ерлешген нечесе юз йылланы боюнда дослукъда яшагъан уьлкени ёлбашчылары артдагъы йылланы боюнда бизин элибиз булан гъы аралыкълары сувукъ-салкъын этмеге башлады. Олар ачыкъдан Россиягъа къаршы оьзлени сиясат ёлун тутду ва савлай дюньягъа аян этди.

2007-нчи йылны башында Германияны Мюнхен шагьарында бютюн дюньяда аманлыкъны сакъламакъ учун оьтгерилеген халкъара конференциясында РФ-ни Президенти Владимир Путин оьзюню доклады булан сёйледи. Шо сёйлевюнде ол дюньяны уьстюндеги гьал алышынгъанын, энниден сонг дюньядагъы агьвалатланы янгыз бир пачалыкъ, демек США, юрютмежегин малим этди. Ону сёзлерине гёре, Россияны политика яндан гючю артгъан. Ачыкълаш­дырып айтсакъ, Россияны Савут Гючлерине янгы дав техника берилмеге башлагъанын ол яшырмады.

Шондан сонг, гьар тюрлю пачалыкълардагъы алимлер ва экспертлер РФ-ни Президенти Владимир Путинни шо докладыны уьстюнде хыйлы пикру алышдырывлар, дёгерек столлар оьтгердилер. Озокъда, оланы бир тайпасы Россияны ёлбашчысы къопдуруп сёйлей деп, инанмайгъанлары да болду. Бирлери буса, оьзлени пачалыкъларыны ёлбашчыларына Владимир Путинни сёзлерине ва ойларына тергев бермеге, гьасил чыгъармагъа таклиф этдилер.

Россияны ёлбашчылары артдагъы 30 йылны боюнда США, НАТО, Евросоюз, Китай, Япония, Сауд Арабыстан, Турция, Бразилия, Аргентина, Куба ва оьзге дагъы да пачалыкълар булан герти кюйде дослукъ аралыкъларын юрютюп турду. Амма бизин дослугъубузну ва къурдашлыгъыбызны шо уьлкелени кёбюсю англамады ва якъламады деп айтмагъа ярай.

2022-нчи йылны январ айыны баш гюнлеринде Россияны ёлбашчылары США-ны, НАТО-ну ва Евросоюзну жаваплы къуллукъчулары булан дюньяны уьстюнде халкъара гьалны ёрукълашдырмакъ учун сёйлешивлер оьтгердилер. Бизин алимлерибиз шо сёйлешивлерден ончакъы пайда ва умпагьат болмажагъын айтса да, Владимир Путин оьрде эсгерилген пачалыкъланы ва къурумланы ёлбашчылары булан бир ойгъа гелмеге бажарылар деп аз буса да юрегинден инана болгъандыр.

РФ-ни Президенти Владимир Путин артдагъы бир нечесе йылланы боюнда США-ны ёлбашчыларына НАТО къуруму Россияны дазуларына багъып узатмакъны гери уруп турду. Демек, НАТО гюнчыгъышгъа багъып генглешген сайын бизин элибизге къоркъунчлукъ бар. Айтагъаным, США-ны гьатта ядерный савуту Европаны ортасына етишдирилген ва шондан таба бизин аманлыгъыбызгъа зарал гелтирмеге бола.

Артдагъы 8 йылны боюнда Украинадагъы питне онда яшайгъан россиялылагъа кёп къайгъылар ва къыйынлыкълар гелтирип турду. Масала, Донецк ва Луганск областларда яшайгъан бары да халкъны Украинаны ёлбашчылары бандитлеге ва террористлеге тенг этдилер. Олагъа пачалыкъны янындан бир де социал якълав ва кёмек этилмей турду. Ондан къайры да, шонда яшайгъан халкъны уьстюне, гьар гюн йимик, гьар тюрлю савутдан атышывлар этип турду. ООН-ну хас маълуматларына гёре, артдагъы 8 йылны боюнда ДНР ва ЛНР регионларда минглер булан адамлар такъсырсыз кюйде оьлтюрюлген ва яралангъан.

Украинаны гьалиги ёлбашчыларына США-ны ва НАТО-ну бажарывлу ёлбашчылары гьар яндан «ягь ва ругь» берип турдулар. Айтагъаным, олагъа санавсуз кюйде савут бергенден къайры да, сёз булан да Россиягъа къаршы кисдирип турдулар.

Шоллукъда, зарал гёрюп тургъан миллионлар булангъы халкъны яшавун яхшылашдырмакъ муратда Россияны Президенти Донецк ва Луганск халкъ республикалары харлысыз деп билдирди ва, оланы тилевюне гёре, савутлангъан ва миллетчилик режимни тайдырмакъ учун РФ-ни Савут Гючлерини бёлюклери Украинаны топуракъларына гийирилди.

Россия бугюнлерде Украинада оьтгерип турагъан хас чараланы барышында аслу гьалда савутлар сакъланагъан складланы, дав аэдромланы ва оьзге шолай биналаны дагъылта ва буза. Демек, тиши-тырнагъына ерли савутланлан ва миллетчиликни якълайгъан режимни тайдырмакъ учун хас чаралар гёрюле.

Озокъда, шо чараланы барышында контракт булан сёйлешив этген асгер къуллукъчулар да оьзлени ортакъчыгъын болдура. Олар ерли халкъгъа зарал этмейли, оланы оьзлени якълай ва ихтиярларын якълавгъа оьз къошумун болдура.

Гьалиги девюрде герти булан янаша ялгъан ва къалп маълуматлар берилип тура. Гьатта халкъ шо ялгъан ва тюп кюрчюсю ёкъ ялгъанлагъа, гьакъдан эсе, бек инана. Шону булан пайдаланып турагъанлар да бар. Олар жамиятны арасына питне ва къалмагъал яя. Айрокъда, социал сетлерде шолай маълуматлар кёп. Адамлар шоланы гертилигине тергев бермей. Тюртюшювлени барышында эки де якъдан тас этивлер болагъаны да ­ачыкъ. Шону бизин ёлбашчыларыбыз яшырмай, тек къопдурув бар экенлигин унутмагъа тюшмей.

80 йыллар алда савлай дюньяны фашизм ва миллетчиликден азат этген Ватаныбызны гележегине бир тайпалар тогъас салмакъны гьайын этип айлана. Биз шолайлагъа къаршы турмагъа ва олагъа къатты кюйде ачытдырып къапас урмагъа борчлубуз!