Концерт – акция

Маданият Центрны залы алдын ерли гьазирленген стендлер, байракълар тизилип онгарылгъан эди.

Чараны ачгъан ва юрютген район адатлангъан маданият Центрны методисти Барият Исмакова оьзлер оьтгереген концерт РФ-ни Президентини Украинада оьтгереген хас дав чараны ва Россияны Савутлу Гюч­лерин, Россияны армиясын якълав муратда оьтгерилегенин айтды.

Белгили кюйде, 2022-нчи йылны февраль айыны 24-нде РФ-ни Президенти Владимир Путин Украинада хас дав чара башлангъанын билдирди. Бизин халкъ парахатлыкъны ва давсуз яшавну якълай. Тек Украинаны халкъы хоншу Донецк ва Луганск республикаларда яшайгъан халкъгъа этеген зулмусу, гьар гюнлер болагъан оьлтюрювлеге дагъы чыдамагъа ярамайгъаны, Украинаны миллетчилерини яман ойларын ва намарт хыялларын къыркъма герекни англагъан РФ-ни Президенти, олагъа къолда савут булан къаршылыкъ билдирмесе бажарылмайгъанны россиялылагъа англатды.

- Бизин халкъны украиналы ватандашлагъа бакъгъан адамлыгъы, инсанлыгъы, илиякълы янашыву кёп затны англата. Бугюн шо дав бизге, демек бары да халкъгъа, ортакъ. Бизин районну, Дагъыстанны кёп жагьил уланлары шо дав чаралар ортакъчылыкъ эте. Биз олар булан оьктем болабыз. Олар уьйлерине эсен-аман къайтмакъны Аллагьдан тилейбиз. Озокъда, дав агьвалатларда тас этивлерсиз бажарылмай... Оьлгенлени, яралангъанланы есилерине бек авур. Олагъа Аллагь сабурлугъун берсин, яралангъанлагъа кёмек этсин!

Биз билебиз, бизин россиялы асгер уьст гележек, — деди ол.

Ону сёйлевлеринден сонг, Асгендер Исрапилов ёлбашчылыкъ этеген Къарабудагъгентни Агъай Къаплановну атындагъы эргишилерини хору, солистлер Абулазим Найипханов, Гилянханум Агьматова, Умия Амирова, Ризван Акаев ва башгъалары оьзлени йырларын йырлады.

Акция-концертни оьтгеривде Къарабудагъгент 3 номерли орта школаны 7-нчи «в» класыны охувчулары оьзлени клас ёлбашчысы Гулияр Тавлуева булан актив кюйде ортакъчылыкъ этгени ва кёмегин болдургъанны саялы, Къарабудагъгент район адатлангъан маданият Центрны къуллукъчулары олагъа баракалла билдире.